Banka Botërore ngre alarmin: Ja sa do zgjasin çmimet e larta të ushqimeve dhe energjisë

Pushtimi rus në Ukrainë “do të nënkuptojë çmime të larta të ushqimeve dhe energjisë për tre vjet”. Ky është paralajmërimi që ka bërë Banka Botërore së fundmi e cila thotë se ekonomia globale po shkon drejt një ripërsëritje të rritjes së ngadaltë ekonomike dhe inflacionit të lartë të viteve 1970.

Alarmi i Bankës Botërore raportohet nga “The Guardian“, e cila për lajmin e saj në uebsajt, ka përdorur një nga fotot e shkrepura gjatë protestave kundër rritjes së çmimeve të naftës dhe ushqimeve në Tiranë.

Në një analizë të zymtë, Banka Botërore tha se ekzistonte rreziku që kostot e vazhdueshme të larta të mallrave që zgjasin deri në fund të vitit 2024 do të çonin në stagflacion – aktivitet i ngadaltë i kombinuar me presione të forta të kostos së jetesës.

Perspektiva më e fundit e Bankës për tregjet e mallrave tha se gjatë dy viteve të fundit bota kishte parë rritjen më të madhe të çmimeve të energjisë që nga kriza e naftës e vitit 1973 dhe rritjen më të madhe në çmimet e ushqimeve dhe plehrave që nga viti 2008.

Si rezultat i ndërprerjeve të tregtisë dhe prodhimit të shkaktuar nga pushtimi rus i Ukrainës, Banka parashikon një rritje prej 50% të çmimeve të energjisë këtë vit.

Ajo pret që çmimi i naftës së papërpunuar Brent të jetë mesatarisht 100 dollarë për fuçi në vitin 2022, niveli i tij më i lartë që nga viti 2013 dhe një rritje prej më shumë se 40% krahasuar me 2021.

Çmimet pritet të bien përsëri në 92 dollarë në vitin 2023, por sërish shumë më të larta se sa mesatarja vjetore prej 60 dollarë për fuçi.

Çmimet evropiane të gazit pritet të jenë dy herë më të larta në vitin 2022 sesa në 2021, ndërsa çmimet e qymyrit pritet të jenë 80% më të larta.

Banka pret që çmimet e grurit të rriten më shumë se 40% këtë vit, duke ushtruar presion mbi ekonomitë në zhvillim që mbështeten në importet e grurit nga Rusia dhe Ukraina.