Banorët në protestë: Pas 30 vitesh mundim, na del Salillari pronar

“Po na marrin tokat që na i ka dhënë shteti.” Kështu shprehen dhjetëra banorë të zonës së Fierit, të cilët pretendojnë se po u cenohet prona në fshatin Boçovë. Bëhet fjalë për rreth 100 dynym tokë të përfituar sipas ligjit 7501, e cila për më shumë se një vit e gjysmë rezulton e regjistruar me certifikatë pronësie në emër të kompanisë “Bervi Construksion”.

Banorët akuzojnë gjithashtu se në këtë histori është e përfshirë edhe kompania “Salillari”, e cila dyshohet se po ndërton panele diellore në pjesë të tokave që ata i konsiderojnë të tyret. Sipas tyre, është e papranueshme që pas 30 vitesh sorollatje nëpër institucione për t’u pajisur me dokumente të pronësisë, të përballen sot me një mbivendosje të tillë të pasurisë.

Ata shprehen se toka është e vetmja burim të ardhurash për familjet e zonës dhe kërkojnë që autoritetet të ndërhyjnë për t’u rikthyer pronën që, siç thonë, u takon me ligj.

Nga ana tjetër, burime nga njësia administrative Levan bëjnë me dije se disa prej banorëve kanë depozituar zyrtarisht ankesat e tyre. Pas marrjes së denoncimeve, njësia i ka kërkuar firmës “Bervi Construksion” të paraqesë dokumentacionin që pretendon se zotëron, por deri tani kompania nuk ka dhënë asnjë përgjigje.

Çështja vijon të mbetet e hapur, ndërsa banorët kërkojnë transparencë dhe verifikim të plotë të dokumenteve që kanë sjellë në këtë situatë të pazakontë të drejtave të pronësisë.