Basha: Biznesi ne luftë për mbijetesë, po mbyten nga rritja e taksave e korrupsioni

Kreu i PD-së, Luzlim Basha tha se biznesi është në luftë për mbijetesë si rezultat i politikave të dështuara, sipas tij të qeverisë.

Me një shënim në facebook, Basha shkruan se PD është e vendosur për uljen e taksave dhe për krijimin e kushteve të barabarta.

“Prej kohësh, Shqipëria po tregohet me gisht si kryeqendra e krimit në Ballkan. Ju ftoj të punojmë së bashku që ta kthejmë në kryeqendrën e biznesit në Ballkan”, shkruan kreu i PD-së mes të tjerash.

Postimi i plotë i Bashës:

Biznesi është në luftë për mbijetesë si rezultat i politikave të dështuara të kësaj qeverie. Sipërmarrjet po mbyten nga rritja e taksave, kostot e larta dhe korrupsioni i kudogjendur që kanë shkaktuar klimën më të keqe të biznesit në Europë.

Ndryshe nga kjo qeveri, biznesi i çliruar, i rimëkëmbur dhe i fuqizuar është në zemër të vizionit tonë për Shqipërinë.

Sipërmarrja shqiptare ka aftësitë dhe gjenialitetin për të çarë përpara, për të arritur sukses, për të qenë shtyllë e zhvillimit, punësimit dhe mirëqenies sociale. Ajo që i duhet është një qeveri që i kupton, që i mbështet, një qeveri që ju jep pak ndihmë kur kanë nevojë; një qeveri jo për t’jua bërë jetën më të vështirë, por më të lehtë.

Prandaj ne jemi të vendosur për uljen e taksave, për luftën kundër korrupsionit dhe krijimin e kushteve të barabarta dhe konkurencës së ndershme. Ne duam që sipërmarrësit të kenë sukses, të fuqizohen, të punësojnë, të rriten.

Prej kohësh, Shqipëria po tregohet me gisht si kryeqendra e krimit në Ballkan.

Ju ftoj të punojmë së bashku që ta kthejmë në kryeqendrën e biznesit në Ballkan.