Basha i ashpër pas padisë së Ramës: Familja Haradinaj ka derdhur gjak, të ngrihemi në revoltë

Kryetari i PD Lulzim Basha ka reaguar lidhur me padinë e kryeministrit Rama në drejtim të kryeministrit në detyrë të Kosovës Ramush Haradinaj, të cilin e akuzon për shpifje.

Basha e konsideron padinë e Ramës një akt të ulët, që turpëron çdo shqiptar, ndërkohë që Haradinaj dhe familja e tij kanë derdhur gjak për çlirimin e Kosovës.

Postimi i plotë i Bashës:

Pseudo-padia e Edi Ramës ndaj kryeministrit të Kosovës Ramush Haradinaj akt i ulët që na turpëron të gjithëve. Meriton refuzimin dhe revoltën legjitime.

Pseudo-padia e Edi Ramës ndaj kryeministrit të Kosovës është një perversitet i shëmtuar anti-kombëtar. Është turp i pakapërdishëm që Ramush Haradinaj, pas gjakut të tij dhe familjes së tij për çlirimin e Kosovës, pas betejave me akuzat e montuara të Beogradit, të përballet me pasojat e degjenerimit dhe vasalitetit të Edi Ramës.

Ky akt i ulët që na turpëron të gjithëve meriton refuzimin dhe revoltën legjitime ndaj një kryeministri të dështuar fund e krye dhe ndaj falimentimit të tij politik dhe moral para Shqipërisë dhe mbarë kombit shqiptar.