Basha mesazh të fortë për Berishën: Jo struktura paralele. Do të zbatoj statutin për shkeljen e vendimit të Kryesisë

Lulzim Basha paralajmëroi gjatë takimit me kryetarët e degëve të PD se do të zbatojë statutin ndaj kujtdo që ka shkelur vendimin e Kryesisë,  përfshirë këtu edhe Sali Berishën.

Kryedemokrati tha po ashtu se nga Kuvendi Kombëtar i 18 dhjetorit, PD do të dalë më e bashkuar, dhe partnere e palëkundur me SHBA-të dhe BE-të,

“Do të bëjë Sali Berisha miting me 11 dhjetor? Apo mendon se do të ngrejë struktura paralele? Ka thënë që nuk e njeh Kuvendin e datës 18 si Kuvend legjitim. E kuptoj asgjë legjitime nuk njeh Sali Berisha. Sepse qëllimi është ilegaliteti, bunkerizimi, destabilizimi i PD. Por veprimet ilegjitime, tentativa për bunkerizim, dëmtim i interesave elektorale dhe politike të PD, e kanë përgjigjen në Statut. Dhe do të zbatoj Statutin ndaj kujtdo. Kush shkel vendimin e Kryesisë e partisë, fatin e ka të caktuar nga Statuti i partisë, përfshirë këtu edhe Sali Berishën. Boll është boll. Asnjë anëtar nuk është mbi Statutin dhe nuk është mbi të tjerët”, u shpreh Basha në mbledhje.

“Kuvendi i 18 dhjetorit, bashkim i demokratëve”, Basha me kryetarët e degëve të PD: Beteja me njëri-tjetrin i shërben vetëm Ramës

Në mbledhjen me 71 kryetaret e degëve të PD, kryetari i PD, Lulzim Basha theksoi si detyrë kryesore është që partia të dalë e bashkuar nga Kuvendi i 18 dhjetorit, bëjnë me dije burime për “Panorama.al”.

Qëllimi kryesor është vazhdimi i betejës kundër Ramës, ka theksuar kryedemokrati në fjalën e tij.

“Rama është kundërshtari ynë i përbashkët, pavarësisht çfarë mendojnë në këtë situatë që po kalojmë. Beteja me njëri-tjetrin nuk na çon askund. I shërben vetëm Ramës dhe patericave të tij, që i po i bëjnë gjithçka që beteja mes nesh të çojë në një ndarje të partisë. Ju jeni dëshmitarë të kësaj”, -tha Basha.

Kujtojmë që Partia Demokratike është përfshirë nga debate të brendshme, pasi Basha dhe Berisha kanë shpallur dy data të ndryshme për Kuvendin Kombëtar.