Berisha: Pres administratën Trump për të nisur përpjekjet për zhbërjen e vendimit “non grata”

Kreu i Partisë Demokratike, Sali Berisha, deklaroi se është i vendosur të luftojë për zhbërjen e vendimit që e shpalli atë “non grata” nga SHBA, por tha se do të presë derisa administrata e Presidentit të zgjedhur, Donald Trump, të marrë pushtetin.

“Siç kam theksuar, i gjithë problemi im dhe vendimi im për moslobim lidhej me ata që kryen grushtin e shtetit ndaj opozitës shqiptare. Me përpjekjen antidemokratike për të kontrolluar opozitën, kontrolluar kryetarin e saj, për ta shndërruar opozitën në një vegël të Edi Ramës,” tha Berisha.

Duke iu referuar vendimit kundër tij, ai e quajti atë “një njollë të zezë për ata që e vendosën” dhe u zotua se do të ndjekë të gjitha hapat e nevojshëm për të zhbërë këtë akt.

“Tani që ata dorëzojnë pushtetin, unë pres dorëzimin e pushtetit nga ana e tyre, që unë të filloj përpjekjet e mia për të paraqitur këtë akt, që do të ngelet, në historinë e demokracisë, si një njollë e zezë për ata që e vendos,” shtoi ai.

Berisha theksoi se veprimet e tij do të filjnë pasi administrata e re e Trump të inaugurohet dhe të nisë punën.