Berisha: Rama si Enver Hoxha, fyerje antisemite ndaj izraelitëve…

Komenti i ish-Kryeministrit Berisha

Edi Rama rikthehen ne parlament gjuhën e urrejtjes të Enver Hoxhës ndaj hebrenjve!

Të dashur miq, sot Edvin Kristaq Rama riktheu pas dekadash në parlament gjuhën e urrejtjes së etërve të tij mizor, Enver Hoxhës dhe klikës së tij ndaj hebrenjve. Neo-bllokmeni Edivin Kristaq Rama përdori sot në parlament terminologjinë tipike hoxhiste ndaj hebrenjve. Ai, në një shpërthim urrejtje dhe përçmimi ndaj deputetëve të opozitës por edhe kombit hebre, tha në parlament se “ju jeni gati të bëheni çifute, jeni gati të bëheni eskimez, jeni gati të beheni dele e zezë e këtij vendi..”

Kjo është një fyerje antisemite tipike hoxhiste ndaj kombit hebre. Ky është një akt tejet i rëndë dhe i papërgjegjshëm i një njeriu që ruan trashëgiminë dhe urrejtjen e etërve të tij ndaj një kombi mik, ndaj një kombi që nga urrejtja raciste përjetoi Holokaustin në Luftën e Dytë Botërore. Rama, njëlloj si Enver Hoxha, me gjuhë përçmuese dhe urrejtje zgjodhi për të fyer deputetët e opozitës me krahasimin e tyre me çifutë dhe eskimez, apo dele të zeze duke besuar se me këto epitete mund ti poshtërojë ata.

Me këtë rast, duke dënuar me ashpërsinë më të madhe këtë deklaratë antisemite, i them Edi Ramës se as Hitleri dhe as Enveri apo Hitleri shqiptar nuk arriti kurrë të cënojë respektin, miqësinë e shqiptarëve ndaj hebrenjve dhe nuk mund ta cënojë askush.

Shqiptarët me qëndrimin e tyre ndaj Holokaustit firmosën faqet ndër më të ndritura në historinë e tyre por edhe të qytetërimit perëndimor!