“Ulsi, më shih pak drejt në sy! E meku, e qepi.”

Kryetari i Partisë Demokratike, Sali Berisha, e quajti gënjeshtër pretendimin e kryeministrit Edi Rama se ishte shkelur ligji dhe Kushtetuta me pezullimin nga detyra të zv/kryeministres Belinda Balluku, e marrë e pandehur për tunelin e Llogarasë dhe Lotin 4 të Unazës së Madhe, për shkelje të barazisë në tenderë.

Sipas Berishës, Rama gjeti një justifikim ligjor për të mos e shkarkuar Ballukun dhe iu kthye edhe historisë së takimit që zgjati 7 orë në Kryeministri pas masës së GJKKO-së ndaj zv/kryeministres me kërkesë të SPAK.

Ai deklaroi se, ndërsa Rama nuk e shkarkoi Ballukun, thirri në zyrë si ndërmjetës edhe ish-ministrin e Drejtësisë, Ulsi Manja, dhe aty sipas tij pati debate mes deputetit dhe ministres, ku kjo e fundit i ka folur edhe me kode.

“Bien dakord të thërrasin të dy Uluziun si urë. E kapët ju dhe me kamerat tuaj dhe pas një farë kohe u fut atje. U thirr në zyrë nga Rama pas takimit me Ballukun. Uluziu natyrisht mbajti anën e Ramës. E çfarë i tha Lubia? I tha: ‘Më shiko pak në sy kur flas, më shiko pak në sy!’ E meku, e qepi! Muret nuk kanë vetëm veshë, kanë edhe sy”, u shpreh Berisha, duke bërë publike detaje të tjera nga biseda e pretenduar në zyrën e Ramës mes të treve.

Më parë, Berisha ishte shprehur se Balluku e kishte kërcënuar Ramën duke i thënë se “nuk ishte qurrashi i Bashkisë” apo se “mund ta merrte me vete”.