Bie zjarr në një apartament pranë stadiumit “Selman Stërmasi”

Një apartament në afërsi të stadiumit “Selman Stërmasi” në Tiranë është përfshirë nga zjarri pasditen e kësaj të premteje.

Ngjarja ka shkaktuar alarm, ndërsa shërbimet zjarrfikëse kanë mbërritur menjëherë në vendngjarje pas marrjes së njoftimit për flakët. Ekipet kanë nisur ndërhyrjen për të vënë situatën nën kontroll dhe për të parandaluar përhapjen e zjarrit në pjesët e tjera të banesës.

Nga të dhënat paraprake mësohet se flakët kanë përfshirë një pjesë të kuzhinës së apartamentit. Ndërhyrja e zjarrfikësve ka bërë të mundur izolimin e vatrës, duke shmangur përhapjen e saj në ambientet e tjera.

Dy dhoma të banesës nuk janë prekur nga zjarri, çka ka ndihmuar në kufizimin e dëmeve materiale.

Deri tani nuk raportohet për persona të lënduar si pasojë e ngjarjes. Ndërkohë, ende nuk janë përcaktuar shkaqet që kanë shkaktuar zjarrin dhe pritet që verifikimet përkatëse të hedhin dritë mbi rrethanat e incidentit.