Bllokohen 5 ton produkte të kompanisë “Tona”

Autoritetet kanë ndërhyrë këtë të mërkurë në Tiranë, duke ndaluar nga qarkullimi një sasi të konsiderueshme produktesh ushqimore që nuk përmbushnin kriteret ligjore të informimit për konsumatorin.

Drejtoria Rajonale e Agjencisë Kombëtare të Ushqimit ka bllokuar rreth 5 ton djathë Gouda dhe 944 kilogramë fileto pule, të importuara nga kompania “Tona alb shpk”.

Sipas verifikimeve të kryera në terren, produktet rezultuan të ishin hedhur në treg pa kundër-etiketë në gjuhën shqipe, një detyrim i përcaktuar qartë nga legjislacioni për ushqimin dhe sigurinë ushqimore. Mungesa e këtij informacioni e bën të pamundur njohjen e përbërjes, origjinës dhe afatit të përdorimit nga ana e konsumatorëve.

Përveç bllokimit të menjëhershëm të mallrave, subjekti është ndëshkuar edhe me masë administrative gjobë, për shkelje të rregullave të etiketimit dhe të gjurmueshmërisë së produkteve ushqimore. Autoritetet bëjnë me dije se masat janë marrë në funksion të mbrojtjes së shëndetit të konsumatorit dhe garantimit të standardeve të sigurisë në treg.

Kontrollet në tregun ushqimor pritet të vijojnë edhe në ditët në vijim, me fokus respektimin e detyrimeve ligjore nga operatorët ekonomikë.