Bllokohet sistemi TIMS në Kapshticë dhe Kakavijë, mesazh nga hakerat në kompjutera

Ka rënë sistemi TIMS në doganën e Kapshticës që prej mbrëmjes së premtes. Prej 12 orësh, Dogana e Kapshticës po funksionon pa sistem.

Sipas informacioneve të konfirmuara nga Drejtoria e Kufirit, po punohet me regjistra në mënyrë manuale, për të mos lejuar krijimin e radhëve. Deri më tani lëvizjet janë normale, pasi janë shtuar edhe punonjësit e doganës që bëjnë regjistrimin e qytetarëve.

Mësohet se sistemi TIMS ka rënë dhe në Pikën e Kalimit Kufitar të Kakavijës që prej orës 20:00, njofton Syri TV. Të gjithë kompjuterët nuk ndizen dhe shfaqin një mesazh që thotë: “Shqipëria po vuan dhe do të vuajë ende, për përkrahjen që i ka dhënë iranianëve të MEK”.

Si rrjedhim, në Kakavijë nuk kalon dot me sistemin TIMS dhe edhe aty, Policia ka nxjerrë regjistrat dhe punon manualisht, çfarë ka krijuar radhë.