Bordi i Ramës ua ul sërish shqiptarëve çmimet e karburanteve

Bordi i Transparencës ka vendosur këtë të premte, më 8 maj 2026, çmimet e reja tavan për shitjen e karburanteve në vend, duke përcaktuar kufij maksimalë si për tregun me pakicë ashtu edhe për atë me shumicë.

Sipas vendimit, çmimi i gazoilit për konsumatorët nuk duhet të kalojë 193 lekë për litër, ndërsa për shitjen me shumicë kufiri është vendosur në 181 lekë për litër. Ndërkohë, për benzinën çmimi maksimal me pakicë është 179 lekë për litër, ndërsa me shumicë 167 lekë për litër.

Këto çmime kanë hyrë në fuqi menjëherë, konkretisht nga ora 13:30 e datës 8 maj, dhe do të mbeten në fuqi deri në një vendim të ri të Bordit, i cili do të reflektojë luhatjet e tregut ndërkombëtar.

Autoritetet kanë paralajmëruar operatorët e tregtimit të karburanteve për zbatim rigoroz të këtij vendimi. Çdo shkelje do të shoqërohet me masa të forta administrative, deri në pezullim të aktivitetit për subjektet që nuk respektojnë çmimet e përcaktuara.

Institucionet përgjegjëse kanë theksuar se ky vendim synon mbrojtjen e konsumatorëve dhe garantimin e konkurrencës së ndershme në tregun e karburanteve.

Në sqarimin shoqërues bëhet e ditur se, sipas aktit normativ në fuqi për akcizat, reduktimi i nivelit të akcizës zbatohet vetëm kur çmimet tejkalojnë pragjet e përcaktuara. Duke qenë se çmimet aktuale janë nën këto kufij, akciza do të vijojë të aplikohet në nivel të plotë.