Braho sfidon rivalët, shpalos planin për drejtimin e SPAK-ut

Klodian Braho, një nga kandidatët në garë për postin e drejtuesit të Prokurorisë së Posaçme (SPAK), ka prezantuar sot platformën e tij, duke renditur objektivat dhe reformat që synon të zbatojë nëse do të marrë drejtimin e institucionit.

Gjatë fjalës së tij, Braho u fokusua te garantimi i pavarësisë së prokurorëve, forcimi i strukturës dhe krijimi i mekanizmave të rinj për analizën e informacionit.

“Nëse do të jem drejtues, do të marr masat për ndjekjen e strategjive aktuale. Sa i përket ushtrimit të ndjekjes penale, garantoj zbatimin e parimit të barazisë. Do të kryej veprimet e nevojshme për të mbrojtur pavarësinë e prokurorëve të posaçëm dhe do t’i mbështes ata në ushtrimin e detyrës. Në rast ngarkese do të krijojmë grupe hetimore, pasi vendimet e prokurorëve nuk janë personale, por qëndrime të institucionit,” u shpreh Braho.

Ai gjithashtu theksoi nevojën për ngritjen e një sektori të specializuar në analizën e informacionit, duke u përshtatur me praktikat e vendeve të tjera europiane.

Profili i Klodian Brahos

• Datëlindja: 21 korrik 1982, Skrapar

• Arsimi:

  • 2000–2004: Fakulteti i Drejtësisë

  • 2005–2008: Shkolla e Magjistraturës

• Emërimi në sistem: 14 nëntor 2007

Karriera profesionale

• 2007–2012: Prokuror pranë Prokurorisë së Beratit

• 2012–2015: Prokuror në Prokurorinë e Vlorës

• 2014–2015: Zëvendësdrejtues i Prokurorisë së Vlorës

• 2015–2019: Prokuror pranë Prokurorisë për Krimet e Rënda

• 2019–aktualisht: Prokuror në SPAK

Me një karrierë të gjatë në sistemin e drejtësisë, Braho konsiderohet një nga emrat kryesorë në garën për drejtimin e SPAK, në një moment ku institucioni gjendet në një fazë të rëndësishme për vazhdimësinë e hetimeve të bujshme kundër korrupsionit dhe krimit të organizuar.