“Breçani”, fiton tender 830 milionë lekë nga burgu, për të ruajtur zyrat dhe vlerat monetare të Ujësjellësit të Tiranës

Ndërkohë që ka shumë hallexhinj, korrekt me ligjin e që nuk po marrin dot as ndihmën ekonomike, “të fortët” e botës së krimit të lidhur me kupolën politike, marrin tenderë edhe nga burgu, ku janë futur për grup të strukturuar trafikimi droge e porositje vrasjesh.

Ashtu si trafikanti Lefter Lamaj, miku i Ilir Beqjes, që me urdhër të tij ka marrë 21 milionë Euro tenderë në Shëndetësi gjatë kohës së burgosjes në Itali e pas rastit të Agim Kajmakut etj.; edhe i arrestuari Erzen Breçani vazhdon merr tenderë miliona lekë megjithëse është në burg.

Më 30 nëntor 2023, Drejtoria e Ujësjellës-Kanalizimeve të Tiranës, ka publikuar njoftimin e shpalljes fituese, të kompanisë së policisë private “BREÇANI- R.O.S.P Sh.p.k” të Erzen Breçanit, i vetë-shpallur “kamikaz” i Sali Berishës dhe klient i Edi Ramës.

Sipas dokumentit zyrtar të Ujësjellësit- Tiranë, policia private “Breçani” ka marrë 830 milionë lekë me TVSH, për ruajtjen e zyrave  dhe shoqërimit të vlerave monetare të kësaj kompanie shtetërore, gjatë kohës së arkëtimit dhe transportit nga drejtoria në banka e anasjelltas.

Në shkelje të ligjit për prokurimet, Drejtoria e Ujësjellësit të Tiranës, nuk ka përcaktuar, se për çfarë periudhe kohore do ta kryejë këtë shërbim sigurie vlerash monetare, policia private “Breçani” e të burgosurit për trafikim e pastrim parash droge.

Këtë e dinë “bejlerët” e ujësjellësit, ndërsa “Pamfleti”, referuar dokumentit, konstaton se policisë private të Erzen Breçanit, tenderi i është dhënë duke qenë vetëm ai pjesëmarrës në garë dhe me vlerë kontrate sa 99.5% e fondit limit.

Sipas ligjit për prokurimet publike, kompanive me pronarë të arrestuar  për vepra penale të trafikimit të drogës, grabitjes me dhunë, prostitucionit, krimeve financiare etj. u ndalohet marrja e fondeve shtetërore, madje edhe nëse arrestohen pas shpalljes fitues, atyre u anulohet tenderi.

Ndoshta Drejtoria e UKT apo Kryetari i Bashkisë si Drejtues i Asamblesë Ekonomike të Ujësjellësit, do ta zbatojnë këtë ligj për të anuluar tenderin me vlerë 830 milionë lekë, që i ka dhënë kompanisë së Erzen Breçanit.

Më 10 mars 2019, Shqipëria ka firmosur paktin “Anti-mafie” me SHBA-BE, për të ndërprerë dhënien e fondeve, pasurive e licencave shtetërore, kompanive me pronarë të skeduar, të arrestuar në proces hetimi dhe të dënuar për trafik droge e pastrim parash. Besojmë, se ligjin e dinë dhe shefat e SPAK.