BUXHETI u miratua për 7 minuta, si do të shpenzohen 7,2 miliardë euro

Kuvendi i Shqipërisë miratoi sot nen për nen dhe në tërësi Projektbuxhetin e vitit 2024 dhe projektligjet e paketës fiskale që e shoqërojnë atë.

Buxheti i vitit 2024 parashikon 737.4 miliardë lekë shpenzime publike ose 30.3% e Produktit të Brendshëm Bruto, ndërkohë që të ardhurat buxhetore planifikohen në masën 676 miliardë lekë ose 27.8% të Produktit të Brendshëm Bruto.

Deficiti buxhetor për vitin 2024 planifikohet në nivelin 2.5% të Produktit të Brendshëm Bruto dhe Borxhi Publik do të zbresë poshtë nivelit 60% të PBB-së.

Shpenzimet e Personelit parashikohen në nivelin 119.8 miliardë lekë, duke përfshirë dhe fondin që do të shërbejë për rritjen e pagave në administratën publike, duke nisur nga 1 korriku 2024. Efekti i plotë i rritjes së pagave është 39.1 miliardë lekë, duke filluar nga 1 janari 2025.

Deputetët socialistë të Komisionit të Ekonomisë kanë vënë para një tepsi me bakllava para se të nisin diskutimet për projekt-buxhetin e vitit 2024. Në filmimet që i bën Erjon Braçe llokmat e bakllavasë krahasohen me ndarjen e buxhetit të vitit 2023.

Deputetja Blerina Gjylameti është ajo që bën prezantimin e tepsisë së bakllavasë me rastin e diskutimeve të projekt-buxhetit, ndërsa flet për indeksimin e pensioneve dhe bonusin e pensionistëve.

Por më shumë se për ato pak lekë që do përfitojnë pensionistët, viti 202ë do të jetë i mbarë në veçanti për deputetët, ministrat dhe kryeministrin Edi Rama. Të gjithë këta presin të marrin një dorë të mirë parash, sepse rroga e deputetëve u dyfishua dhe nga 156 770 lekë shkoi në 310 250 lekë të reja ose 3 milion e 100 mijë lekë të vjetra në muaj.

Mbi këto 3 milion lekë të vjetra, shtohen edhe pagesat e naftës, të telefonit, të qirasë dhe dietave të tjera. Disa vite më parë, gjatë zgjedhjeve të vitit 2017 Edi Rama e kërkoi i vetëm tepsinë e pushtetit dhe ia arriti duke lënë në opozitë PD dhe LSI.

Atëherë u fol shumë për tepsinë që simbolizonte mënyrën se si e kishin ndarë partitë administratën shtetërore. Tani që e kanë të vetëm tepsinë, socialistët e kanë mbushur atë me bakllava, ia kanë rritur rrogat vetes dhe ia fusin me gallata. Shikoni videon më poshtë:

Paga e ministrave nga 174 760 lekë shkoi në 318 750 lekë.

Paga e kryeministrit nga 228 000 lekë shkoi në 393.125 lekë.

Paga e Kryetarit të Kuvendit nga 228 000 lekë shkoi në 393.125 lekë.

Buxheti 2024 për skemën  e pensioneve do të financojë rreth 185.8 miliardë lekë, duke siguruar fondet e nevojshme për indeksimin e pensioneve si dhe bonusin e përvitshëm për pensionistët.

Financimi i investimeve publike të programuara për vitin 2024 do të jetë 5.3% e Produktit të Brendshëm Bruto, ose 128.5 miliardë lekë, duke u fokusuar në projektet që mbështesin turizmin, bujqësinë dhe konektivitetin.

Sektori i arsimit do të financohet në total me 78.8 miliardë lekë ose 3.2% e Produktit të Brendshëm Bruto.

Sektori i Shëndetësisë do të financohet me rreth 72.2 miliardë lekë në vitin 2024 ose 3% e Produktit të Brendshëm Bruto.

Sektori i infrastrukturës dhe energjisë do të mbështetet me 52.7 miliardë lekë ose rreth 2.2% e Produktit të Brendshëm Bruto.

Për sektorin e mbrojtjes janë alokuar 2% të Produktit të Brendshëm Bruto, duke arritur për herë të parë objektivin lidhur me angazhimet e marra në kuadër të NATO-s.

Buxheti 2024 mbështet më tej reformën në drejtësi, duke alokuar 26.8 miliardë lekë për këtë sektor, 4.8 miliardë lekë më shumë krahasuar me buxhetin e vitit 2023.

Sa i përket Buxhetit Vendor, shpenzimet për këtë nivel qeverisje për vitin 2024, janë parashikuar në masën 71.1 miliardë lekë, me një rritje prej 10.4% në raport me Buxhetin e vitit 2023.

Buxheti i vitit 2024 shoqërohet me një Paketë Fiskale, e cila synon qëndrueshmëri të legjislacionit dhe politikës fiskale, duke mos ndërmarrë masa të ndjeshme fiskale, por duke vendosur theksin tek mirëadministrimi fiskal.