Caktohet data për intervistat e kandidatëve për kreun e SPAK

KLP ka nisur procesin për përzgjedhjen e drejtuesit të ri të SPAK-ut dhe ka caktuar datën e intervistave publike me kandidatët. Seanca dëgjimore do të zhvillohet më 11 dhjetor 2025, duke nisur nga ora 09:00.

Pas kësaj faze, Këshilli do të vijojë me procedurat e vlerësimit për të vendosur se kush do të marrë drejtimin e Prokurorisë së Posaçme kundër Korrupsionit dhe Krimit të Organizuar.

Në garë janë katër prokurorë të strukturës aktuale të SPAK-ut: Adnan Xholi, Klodian Braho, Doloreza Musabelliu dhe Ervin Gogaj. Secili prej tyre do t’i nënshtrohet një interviste të hapur, ku do të shqyrtohet ecuria profesionale, integriteti, aftësitë menaxhuese dhe vizioni që kanë për institucionin.

Ky proces zhvillohet pak ditë përpara përfundimit të mandatit trevjeçar të kreut aktual të SPAK-ut, Altin Dumanit, i cili e mbyll detyrën më 18 dhjetor.

Profil i shkurtuar i kandidatëve

Adnan Xholi – Prokuror i SPAK-ut dhe drejtues i Seksionit të Krimit të Organizuar. Ka hyrë në sistem në vitin 2004 dhe njihet për angazhimin e tij në hetime të rëndësishme kundër grupeve kriminale dhe korrupsionit.

Klodian Braho – Pjesë e SPAK-ut që prej krijimit të tij; aktualisht drejton Seksionin kundër Korrupsionit. Ka filluar karrierën si prokuror në vitin 2007 dhe ka zhvilluar një eksperiencë të gjerë në çështje të kësaj natyre.

Ervin Gogaj – Prokuror me eksperiencë të gjatë, i përfshirë në strukturën e posaçme që nga dhjetori 2000. Ka punuar në një sërë dosjesh me peshë në luftën kundër korrupsionit dhe krimit të organizuar.

Doloreza Musabelliu – Prokurore e SPAK-ut që nga viti 2004, e njohur për rolin e saj në disa prej hetimeve më të rëndësishme, përfshirë çështjen e njohur si “Plumbi i Artë”.