Çfarë do të ndodhë? Berisha: 24 janari, fundi i qeverisjes Rama

Kryetari i Partisë Demokratike, Sali Berisha, komentoi protestën kombëtare të opozitës që pritet të zhvillohet më 24 janar, duke dhënë paralajmërime të forta për atë që, sipas tij, do të ndodhë atë ditë.

Berisha deklaroi se kryeministri Edi Rama nuk do të jetë më në pushtet, duke theksuar se largimi i tij nuk do të vijë përmes përdorimit të armëve, por si rezultat i forcës së qytetarëve. Sipas tij, presioni popullor do ta detyrojë kryeministrin të largohet.

Gjatë intervistës, Berisha e cilësoi protestën e 24 janarit si një kauzë plotësisht legjitime, madje më të drejtë se çdo protestë e mëparshme. Ai akuzoi qeverinë për korrupsion dhe grabitje të qytetarëve, duke shtuar se një qeveri që kapet duke vjedhur humbet automatikisht legjitimitetin për të qeverisur, pavarësisht ndëshkimeve ligjore.

Sipas Berishës, vendi ndodhet në kushtet e një regjimi autoritar, ku frika përdoret si instrument kontrolli. Ai e përshkroi Ramën si një politikan që ushqen hakmarrje personale dhe që këtë mentalitet e ka shtrirë në të gjithë, siç e quajti ai, “narko-shtetin”.

I pyetur në emisionin “Opinion” për raportin me brezin e ri dhe për mënyrën se si mund të angazhohen të rinjtë, Berisha theksoi se ata nuk intimidohen nga askush. Ai kritikoi ashpër censurën dhe propagandën, duke deklaruar se një numër i madh personash të paguar përhapin gënjeshtra në opinionin publik.

Në mesazhin e tij për të rinjtë, Berisha u shpreh se u ofron mundësinë për të ndërtuar jetën dhe të ardhmen në Shqipëri, duke shtuar se gjatë qeverisjes së tij, numri i shqiptarëve në vend ishte në rritje. Ai theksoi gjithashtu se zgjedhjet e lira mbeten kushti themelor për ndryshim.

Në fund, i pyetur sërish për atë që pritet të ndodhë ditën e protestës, Berisha përsëriti se kryeministri Rama nuk do të qëndrojë në zyrë më 24 janar. “Armë nuk përdorim. Populli ka një fuqi të jashtëzakonshme”, u shpreh ai.