Cila ishte pika e kthesës? Ja si nisi goditja e drejtësisë në Shqipëri

Ish-deputeti i Partisë Demokratike, Dashnor Sula, ka analizuar me tone kritike zhvillimet që, sipas tij, çuan në goditjen e sistemit të drejtësisë në Shqipëri, duke i lidhur ato drejtpërdrejt me ndryshimet kushtetuese të vitit 2008 dhe ngjarjet e mëvonshme politike.

Në një intervistë në emisionin “Off the Record” në A2 CNN, Sula u shpreh se ndryshimet kushtetuese të prillit 2008 ishin pika e kthesës ku politika filloi të kontrollojë drejtësinë për interesa të saj.

“Rasti i 21 prillit 2008, që lidhet me ndryshimet kushtetuese të asaj kohe, ishte momenti kur filloi shembja e drejtësisë në Shqipëri. Unë nuk e kam votuar atë ndryshim, me ndërgjegje. Që aty u prish ekuilibri i sistemit politik dhe nisi rrëzimi i pavarësisë së institucioneve,” deklaroi ai.

Sula risolli në vëmendje edhe dy nga ngjarjet më të rënda të viteve të fundit, Gërdecin dhe 21 janarin, duke i konsideruar si momente kyçe në përkeqësimin e marrëdhënies mes politikës dhe drejtësisë.

“Pas Gërdecit, ku humbën jetën 27 persona, në vend që shteti të kërkonte drejtësi, u bë marrëveshje politike. Pastaj erdhi 21 janari, ku u vranë katër qytetarë në bulevard. Nuk mund të quash prokurorët ‘kriminelë’ apo ‘lavire bulevardi’. Kjo është klimë që nxit dhunën politike,” tha Sula.

Ai u ndal edhe te reforma në drejtësi, e cila, sipas tij, megjithëse u prezantua si një proces pastrimi, nuk i shpëtoi dot ndikimit politik.

“Reforma në drejtësi u përdor si armë politike. U hoqën nga sistemi gjyqtarë dhe prokurorë që nuk ishin të pëlqyeshëm për mazhorancën, ndërsa mbetën ata që politika i përdor dhe i keqpërdor sipas rastit,” theksoi ai.

Në përfundim, Sula vuri theksin te pasojat e këtij ndërhyrjeje të politikës në sistemin e drejtësisë, duke e cilësuar situatën aktuale si një krizë besimi dhe funksionimi.

“Nga 2008-a e këtej, Shqipëria ka hyrë në një spirale ku politika sundon mbi drejtësinë. Kjo është arsyeja pse sot kemi një sistem të brishtë dhe të pasigurt për të gjithë,” përfundoi Sula.