Deborah Keçi në dyert e GJKKO-së, ish-mesfushori i Partizanit i merr vendin! Gjergji Muzaka, drejtori i ri i klubit Tirana

Përditësuar më 5 April 2024, 15:29

Deborah Keçi, e cila është pezulluar nga detyra si drejtoreshë e klubit shumësportësh Tirana pasi u vendos nën hetim nga SPAK për “shpërdorim detyre”, është paraqitur ditën e sotme në ambientet e GJKKO-së për rivlersimin e masës së sigurise.

Deborah Keçi është mes zyrtarëve dhe ish-zyrtarëve të Bashkisë së Tiranës të akuzuar nga Prokuroria e Posaçme për abuzim me tenderat dhe favorizim të kompanisë “5D” në pronësi të Mariglen Qatos dhe Redi Mollajt.

Pas pezullimit të saj nga posti i drejtores së Klubit Sportiv Tirana, bashkia e kryeqyetit është vendosur në lëvizje për ta zëvendësuar

Ish-futbollisti i njohur, Gjergji Muzaka, pritet të jetë drejtori i ri i klubit shumësportësh bardheblu.

Ish-mesfushori i Tiranës, Partizanit dhe Dinamos, prej vitesh është pjesë e sektorit të sporteve në bashkinë Tiranë dhe tashmë ai pritet të zyrtarizohet në një detyrë më të rëndësishme.

Hetimet e SPAK:

Nga hetimet ka rezultuar se Deborah Keçi në cilësinë e titullarit të autoritetit kontraktor Klubi Sportiv “Tirana”, ka favorizuar në një procedurë prokurimi operatorin ekonomik “V.A.S Konstruksion sh.p.k” e njëjtë me “5D Konstruksion” sh.p.k, duke i krijuar avantazhe dhe privilegje të padrejta, si dhe duke e shpallur fitues në mënyrë të parregullt.

Sipas Prokurorisë së Posaçme, Deborah Keçi, ka pasur komunikime direkte me shtetasin Nestor M. administrator i shoqërisë “5D Konstruksion” sh.p.k.

“Së pesti, nga hetimet e kryera është provuar edhe fakti se shtetasja D.K. (Deborah Keçi) në cilësinë e titullarit të autoritetit kontraktor Klubi Sportiv “Tirana”, ka favorizuar në një procedurë prokurimi operatorin ekonomik “V.A.S Konstruksion sh.p.k” e njëjtë me “5D Konstruksion” sh.p.k, duke i krijuar avantazhe dhe privilegje të padrejta, si dhe duke e shpallur fitues në mënyrë të parregullt.

Shtetasja D.K. ka pasur komunikime direkte me shtetasin Nestor M. administrator i shoqërisë “5D Konstruksion” sh.p.k dhe vlerësimin e ofertave të pjesëmarrësve në tender e kanë bërë vetë punonjës të shoqërisë “5D Konstruksion” sh.p.k, duke i dhënë titullari i autoritetit kontraktor shtetasit N.M user-at e anëtarëve të KVO-së”,njoftoi SPAK.

Deborah Keçi duket se është mjaft aktive në rrjetet sociale, ku nuk ka ngurruar të reklamojë jetën e saj të luksit dhe udhëtimet nëpër botë.