Demiraj i ‘Pelikanit’ i shiti vilën Kristian Konit për larje parash

Përditësuar më 29 August 2025, 16:51

Skandali i radhës: Hetim për pastrim parash ndaj biznesmenit të dyshuar Kristian Koni (alias Olsi Meta)

Kristian Koni, i njohur edhe me emrin Olsi Meta, është vënë nën hetim nga organet ligjzbatuese me dyshime të forta për pastrim parash. Hetimet zbulojnë një skemë të dyshuar financiare përmes përdorimit të identiteteve të ndryshme dhe transaksioneve të dyshimta për pasuri të paluajtshme luksoze.

Koni është administrator i firmës “Kriol.Al” sh.p.k., me objekt aktivitetin në eksport automjetesh, tregti pasurish të paluajtshme dhe reklamim në fushën e internetit. Pikërisht përmes kësaj kompanie, ai është përfshirë në një transaksion të dyshuar për një vilë luksoze në zonën e Mulletit.

Vila luksoze në Mullet: nga 808 mijë në 300 mijë euro

Pasuria në fjalë është “Vilë nr. 2-B” në projektin rezidencial “Rolling Hills 2”, me sipërfaqe ndërtimi 391.1 m², 3 kate dhe pishinë. Fillimisht, kjo vilë ishte porositur nga çifti Vesel dhe Rezarta Demiraj nëpërmjet një kontrate sipërmarrjeje me kompaninë “AS Construction” për 808,000 euro.

Por sipas hetimeve, më pas në skemë hyri “Kriol.Al”, e cila nënshkroi një kontratë premtim-shitjeje për të blerë të njëjtën vilë me një çmim shumë më të ulët: fillimisht 280 mijë euro dhe më pas 300 mijë euro  pothuajse gjysma e vlerës reale.

Ky ulje drastike e çmimit ngre dyshime serioze për pastrim parash, duke qenë se diferenca mes çmimit fillestar dhe atij të nënshkruar është e papërputhshme me tregun.

Kontratat e dyshimta dhe pagesat

Dokumentet tregojnë se:

• Në 18 mars 2024, kontrata e parë u revokua, me pretendimin se pala blerëse nuk kishte përmbushur detyrimet financiare.
• Më pas, Vesel dhe Rezarta Demiraj lidhen një kontratë të re me “Kriol.Al” sh.p.k., të përfaqësuar nga Kristian Koni, për shitjen e së njëjtës pasuri me 300,000 euro.
• Pagesa është parashikuar si më poshtë:
  • 202,000 euro brenda 10 ditëve nga nënshkrimi i kontratës, direkt në llogaritë bankare të familjes Demiraj.
  • 98,000 euro të mbetura në disa këste të pacaktuara, në momentin e kontratës përfundimtare.

Gjithashtu, kontrata përcakton se dorëzimi i pasurisë te blerësi do të kryhej pas pagesës së këstit të parë.

Dyshimet e hetimit

Burime hetimore theksojnë se ky transaksion me çmim të ulët dhe pagesa në kushte jo standarde është një indikator tipik i pastrimit të parave. Diferenca e madhe mes çmimit fillestar dhe atij përfundimtar, së bashku me përdorimin e identiteteve të dyfishta nga ana e Konit, janë elementë kyç që kanë vënë alarmin tek autoritetet.

Hetimet për Kristian Konin pritet të zgjerojnë fushën edhe mbi aktivitetin e firmës “Kriol.Al” dhe marrëdhëniet e saj me kompani të tjera ndërtimi dhe pasuri të paluajtshme.