Denoncimi për djalin e deputetit të PS, ç’po hetohet në 4 komisariate

Burime nga Ministria e Brendshme thanë se ka nisur një verifikim në 4 komisariatet e përmendura nga ishpunonjësi i Policisë në intervistën e publikuar dy ditë më parë, por edhe pas deklarimeve të vajzës së dëmtuar. Mësohet se oficerët e SHÇBA-së do të verifikojnë të gjithë librat e shërbimit, kamerat e sigurisë dhe do të pyesin punonjësit e Policisë që mund të kenë pritur Xhisela Malokun, siç pretendohet në deklarime.

Bëhet fjalë për Komisariatin nr.3 dhe nr.6 në Tiranë, si dhe për Stacionin e Policisë së Fushë-Krujës dhe Komisariatin e Krujës. Burimet thanë se do të verifikohen të gjitha procedurat e ndjekura në lidhje me denoncimet e pretenduara në këto komisariate.

Në mbështetje të këtij hetimi, është vënë në dispozicion edhe një material nga Shërbimi për Çështjet e Brendshme dhe Ankesat në Durrës, ku është drejtuar shtetasja e dëmtuar, me pretendimin se është kanosur në zyrën e një oficeri policie. Pasi të kryhen të gjitha këto verifikime, do të vendoset nëse do të nisë procedim penal ose jo.

HETIMI NGA PROKURORIA

Prokuroria e Tiranës ka nisur hetimet ditën e sotme në lidhje me dëshminë e ishoficerit të Policisë së Krujës, publikuar dy ditë më parë nga Partia Demokratike, ku flet për kërcënimet që i janë bërë nga djali i deputetit Rrahman Rraja. Organi i akuzës ka administruar në dosje materialin filmik e zanor me dëshminë e oficerit Emiljano Nuhu, ndërsa objekti i hetimit është verifikimi i rrethanave të paraqitura në dëshmi. Prokuroria po kryen veprimet paraprake për të vlerësuar nëse ka elementë të veprës penale në materialin e publikuar.

Ndërkohë, grupi i hetimit pritet të këqyrë regjistrin e hyrje-daljeve të Komisariatit të Policisë së Krujës për të verifikuar saktësinë e deklarimeve të dhëna nga ish-oficeri Emiljano Nuhu në një intervistë për gazetarin Çollaku. Në këtë intervistë, ai ka thënë se është kërcënuar në zyrë me pistoletë edhe nga djali i deputetit Rrahman Rraja, që të mos hetonte më kallëzimin e shtetases Xhisela Maloku.

Në vazhdim të procedurave të hetimit nëse gjenden elementë të veprës penale grupi i hetimit do të kërkojë shpjegime edhe nga protagonistët e përmendur në dëshminë e ish-policit Emiljano Nuhu. Prokuroria do të verifikojë edhe kallëzimet që ka bërë vajza në disa komisariate. Për këtë arsye, grupi i hetimit ka marrë edhe dosjen e Prokurorisë së Durrësit për të parë nëse janë kryer të gjitha veprimet e nevojshme hetimore për zbardhjen e padisë së bërë nga shtetasja Xhisela Maloku.