Detajet/Vrasja e Festim Lato, si u fut në kurth Presidenti i vetëshpallur i Çamërisë

Sadrie Kasimi, bashkëpunëtore e Presidentit të vetëshpallur të Republikës së Çamërisë, Festim Lato, ka rrëfyer detaje mbi vrasjen e 43-vjeçarit në Holandë.

Sipas rrëfimit të Kasimit, Lato u fut në kurth nga një djalë holandez, i cili i ka thënë se do shiste makinën.

Ndonëse nuk e bën të ditur emrin e tij, ajo thotë se këto informacione i ka mësuar nga të njohur të saj në Holandë dhe vetë kryeministri i vetëshpallur i republikës çame, Ali Aliu.

“E morën, e gënjyen me metodën e tyre që do shiste makinën, dhe e morën e vranë. ishte një djalë holandez që ka marrë pjesë në republikën e Çamërisë dhe ka ardhur 4 herë në Vlorë nga Holanda. Festim Lato ishte me dy njerëz të tij në makinë, e ka thirrur ky djalë i ka thënë do vish se jam me dy njerëz do e shesësh makinën, do vish në kafe? Ai i la të gjitha në makinë, me telefonë dhe ata e morën e vranë. Vec të mira i ka bërë popullit çam, na ka ndihmuar në çdo prizëm, na ka ardhur shumë keq, sikur më ka vdekur djali im, jo një president. Nuk e di si e mashtruan. Të njëjtën gjë na tha edhe kryeministri i republikës Came, Ali Aliu na e sqaroi gjendjen. Në familjen e tyre ka rënë bombë e madhe. E kemi pritur këtë vrasje sikur ka vrarë të gjithë çamët. I lutem Ministrit të Punëve të Jashtme të mos e mohojë Çamërinë. Ne nuk do rrimë rehat tani që na bënë edhe këtë vrasje. Kush e vuri atë njeri që e vranë, dhe në fund t’i fusin thikën ashtu dhe ta lëshojnë rrugëve, është çudi e madhe”, u shpreh bashkëpunëtorja e Latos për çështjen çame, Sadrie Kasimi për Report Tv.

Lajmi se Festim Lato është ekzekutuar në Holandë nga persona ende të paidentifikuar u bë publik nga familjarët. Sipas policisë holandeze, ai është vrarë dhe më pas është hedhur në një kanal.

Prej 25 vitesh Lato jetonte në Holandë, ndërsa periudhën e fundit banonte në një shtëpi në Afferden. Mediat holandeze raportuan se Lato kishte falimentuar me biznesin e tij, duke u zhytur në borxhe disa miliona euro.