Djali i tij u konfliktua, i ati pëson arrest kardiak dhe humb jetën

Një 69-vjeçar ka humbur jetën mbrëmjen e kaluar në Roskovec, pasi dyshohet se ka pësuar arrest kardiak teksa ndodhej pranë vendit ku po zhvillohej një konflikt mes djalit të tij dhe një shtetasi tjetër.

Viktima është identifikuar si B. V., 69 vjeç, banues në Roskovec. Sipas Policisë, rreth orës 20:00 ai është transportuar pa shenja jete në Qendrën Shëndetësore të Roskovecit.

Nga veprimet e para hetimore rezulton se 69-vjeçari nuk ka qenë i përfshirë në konflikt, por vetëm ka qenë i pranishëm gjatë përplasjes së çastit mes djalit të tij dhe personit tjetër.

Dyshimet paraprake janë se situata e krijuar në vendngjarje mund t’i ketë shkaktuar një arrest kardiak, i cili më pas i ka marrë jetën.

Ndërkohë, grupi hetimor, nën drejtimin e Prokurorisë, po vijon punën për të dokumentuar të gjitha rrethanat e ngjarjes dhe për të përcaktuar shkakun e saktë të vdekjes.