Drita shkruan historinë, Shkëndija ndalet në ‘frymën’ e fundit

Mbrëmjen e së enjtes u zhvilluan 18 ndeshjet e raundit të tretë të UEFA Conference League, me emocione të forta për skuadrat shqiptare të rajonit.

Në Dublin, Drita e Gjilanit ka arritur fitoren e parë historike në këtë kompeticion, duke triumfuar në transfertë ndaj Shelbourne me rezultatin minimal 0-1.

Ndeshja nisi me intensitet të lartë dhe mori kthesë në minutën e 16-të, kur James Norris i vendasve u ndëshkua me karton të kuq direkt për një faull të rëndë ndaj Almir Ajzerajt.

Megjithëse Shelbourne krijoi disa raste të rrezikshme, përfshirë një goditje shtylle nga Odubeko, Drita mbeti më e qetë dhe efektive.
Heroi i sfidës ishte Almir Ajzeraj, i cili në minutën e 57-të shënoi golin e vetëm të ndeshjes me një goditje nga distanca që u devijua nga mbrojtësit vendas.

Pas këtij triumfi, “Intelektualët” shënojnë fitoren e parë në historinë e tyre në Conference League dhe ngjiten në vendin e 13-të në renditjen e përgjithshme me 5 pikë.

Në Shkup, Shkëndija e Tetovës ishte shumë pranë një fitoreje të madhe, por u ndal në minutën e 100-të nga Jagiellonia.

Liridon Latifi hapi ndeshjen në minutën e 49-të me një gol të bukur, por në minutën e dhjetë shtesë (90+10) Lozano barazoi rezultatin.
Në fund, polakët mbetën me dhjetë lojtarë pas përjashtimit të Imaz, por Shkëndija nuk arriti të përfitonte.

Conference League – Raundi i 3-të

18:45

• AEK Athinë 1–1 Shamrock

• AEK Larnaca 0–0 Aberdeen

• Celje 2–1 Legia

• KuPS 3–1 Slovan Bratislava

• Mainz 2–1 Fiorentina

• Noah 1–2 Sigma Olomouc

• Samsunspor 3–0 Hamrun

• Shakhtar Donetsk 2–0 Breidablik

• Sparta Pragë 0–0 Rakou

21:00

• Crystal Palace 3–1 AZ Alkmaar

• Dynamo Kyiv 6–0 Zrinjski Mostar

• Hacken 1–2 Strasbourg

• Lausanne 1–1 Omonia

• Lincoln Red Imps 1–1 Rijeka

• Rayo Vallecano 3–2 Lech Poznan

• Shelbourne 0–1 Drita

• Shkëndija 1–1 Jagiellonia

• SK Rapid 0–1 Universitatea Craiova