Durrës/ Shpronësime me çmime qesharake për projektin T.I.D

Në qytetin bregdetar të Durrësit po zhvillohet një projekt që ka ngjallur indinjatë tek qytetarët. Projekti i quajtur T.I.D Durrës po prek prona private, duke i shpronësuar me çmime shumë më të ulëta se vlera reale e tregut. Banorët e prekur e cilësojnë këtë proces si një grabitje e hapur në emër të “zhvillimit urban”.

Një qytetar i Durrësit ka bërë kërkesë zyrtare në Bashkinë Durrës, duke u bazuar në Ligjin Nr. 119/2014 “Për të drejtën e informimit”, për të marrë dokumentacionin dhe detajet mbi projektin. Por përgjigjja e vetme deri tani ka qenë heshtja institucionale.

“Mungesa e transparencës tregon qartë se vendimmarrja bëhet në mënyrë arbitrare dhe në dëm të qytetarëve. Në vend që të mbrojnë interesin publik, pushteti vendor dhe ai qendror po tentojnë të shuajnë zërat kritikë dhe të kalojnë projektin në heshtje”, – deklaron ai.

Përveç cënimit të pronave private, banorët paralajmërojnë se ky projekt rrezikon edhe trashëgiminë antike të qytetit. Ata shprehen se nuk do të dorëzohen përballë një procesi të padrejtë dhe do ta denoncojnë publikisht.

“Durrësi nuk është pronë e pushtetarëve, por e qytetarëve”, është mesazhi i tyre i qartë.

Shënim për Publik.al

Rasti i shpronësimeve për projektin T.I.D Durrës është një shembull flagrant i mungesës së transparencës në vendimmarrjen publike. Në një kohë kur çmimet e tregut të pasurive të paluajtshme në Durrës janë rritur ndjeshëm, ofrimi i kompensimeve qesharake për pronarët përbën një shkelje të drejtave themelore të qytetarëve.

Heshtja e Bashkisë përballë një kërkese të bazuar ligjërisht sipas Ligjit “Për të drejtën e informimit” nuk është thjesht neglizhencë,  është një strategji e qëllimshme për të fshehur prapaskenat.

Ky rast duhet të ngrejë shqetësim publik dhe institucional, pasi nuk bëhet fjalë vetëm për prona private, por edhe për identitetin historik e kulturor të Durrësit, që rrezikon të tjetërsohet nga projekte pa llogari e pa përgjegjësi.