Ngjarja horror në Tapizë/ Gruaja lindi në banesë, vajza e madhe hodhi foshnjën në lumë. E përfshirë, dyshohet e gjithë familja
Detaje të reja janë zbardhur rreth ngjarjes së rëndë të ndodhur një ditë më parë në Tapizë, ku një foshnje e porsalindur u hodh në lumë.
Policia ka dyshime se në ngjarjen e rëndë është e përfshirë e gjithë familja dhe se në momentin e lindjes së 42-vjeçares Leta Koçi, kanë qenë të pranishëm edhe anëtarë të tjerë. Dyshimet kryesore të policisë bien mbi vajzën e madhe të familjes, e cila mendohet se ka hedhur mbetjet e foshnjes në qese dhe pastaj në lumin e Tapizës.
Por kur është marrë në pyetje, vajza ka mohuar të ketë patur dijeni për foshnjen brenda qeses.
Deri më tani policia ka arrestuar vetëm nënën e foshnjes, pasi akuzohet për vrasjen e të porsalindurit. Ajo ndodhet në spital në gjendje të rënduar psikologjike, por ka refuzuar të bashkëpunojë me autoritetet për zbardhjen e rrethanave të ngjarjes dhe shkaqet që e kanë shtyrë drejt një akti të tillë.
42-vjeçarja është nënë e 5 fëmijëve dhe për shtatzëninë e saj nuk kanë qenë në dijeni as mjekët e Qendrës Shëndetësore Tapizë. Ata thonë se me rastin janë njohur vetëm pas publikimit në media.
“Për rastin në fjalë jemi njohur nga mediat. Ne e njohim si familje shumë e mirë, nënë e përkushtuar, është nënë e 5 fëmijëve. Për pjesën e shtatzënisë skemi fare dijeni, nuk janë paraqit fare. I gjithë lajmi është marrë vesh nga mediat”.
