Egnatia sfidon sonte Celjen për ëndrrën europiane

Egnatia rikthehet sot në fushë për sfidën më të rëndësishme të sezonit, teksa përballet me kampionët e Sllovenisë, Celje, në një duel që do të vendosë fatin e kualifikimit. Pas barazimit spektakolar 3-3 në ndeshjen e parë në Rrogozhinë, gjithçka mbetet e hapur dhe shanset janë të barabarta për të dyja skuadrat.

Kampionët e Shqipërisë janë vetëm një hap larg historisë, pasi një rezultat pozitiv në transfertë do t’i çonte për herë të parë në raundin e tretë eliminator të Champions League. Një arritje e tillë do të ishte një moment i madh për klubin dhe për futbollin shqiptar në përgjithësi.

Skuadra e drejtuar nga Nevil Dede pritet të zbresë në fushë me një strategji më të kujdesshme në mbrojtje, pasi në takimin e parë u ndëshkua nga gabime të evitueshme. Megjithatë, repartit ofensiv i besohet shumë, pasi ka treguar formë të shkëlqyer në ndeshjet europiane të kësaj vere dhe mbetet arma kryesore për të goditur kundërshtarin.

Egnatia ka dëshmuar se ka potencial për të ecur përpara në arenën ndërkombëtare. Pas eliminimit të kampionëve të Moldavisë, Petrokub, skuadra rrogozhinase ka fituar besim dhe tashmë është vetëm 90 minuta larg një tjetër kapitulli historik.

Nëse arrin të kalojë këtë pengesë, Egnatia do të përballet në raundin e tretë eliminator me fituesin e çiftit Ararat – Shamrock Rovers, duke vijuar rrugëtimin në kompeticionin më prestigjioz për klube në Europë.

Ndeshja Celje – Egnatia do të zhvillohet këtë mbrëmje në orën 20:15, ndërsa drejtësinë në fushë do ta vendosë arbitri holandez Joey Kooij. Të gjitha sytë janë te kjo sfidë, ku 90 minuta mund të vendosin një nga sukseset më të mëdha të futbollit shqiptar në vitet e fundit.