Emirton Suli: Daniel Shima paracaktonte tenderët te AKSHI

Një dëshmi e fortë e dhënë para prokurorëve të SPAK nga Emirton Suli, zyrtar i AKSHI-t, hedh dritë mbi një skemë të dyshuar për manipulimin e tenderave në këtë institucion. Sipas tij, kriteret e procedurave të prokurimit nuk hartoheshin në mënyrë të pavarur, por paracaktoheshin që në fillim për të favorizuar subjekte të caktuara.

Suli ka deklaruar se dokumentet për tenderat shpërndaheshin të gatshme përmes një adrese emaili të krijuar posaçërisht, [email protected], e cila, sipas tij, përdorej për të fshehur burimin real të përgatitjes së tyre. Ai pretendon se kjo praktikë ishte e qëllimshme për të shmangur identifikimin e personave apo kompanive që qëndronin pas përgatitjes së dokumentacionit.

Në një nga rastet konkrete, ai thekson se ishte e qartë që një procedurë ishte ndërtuar për të favorizuar një kompani të caktuar, ndërsa vendosja e kritereve specifike, si pajisja me certifikatën CSP, shërbente për të përjashtuar operatorë të tjerë nga gara.

Sipas dëshmisë, një rol kyç në këtë proces kishte Daniel Shima, i cili jo vetëm shpërndante dokumentet standarde, por edhe përcaktonte operatorët ekonomikë që do të ftoheshin në procedura. Suli shprehet se në shumicën dërrmuese të rasteve, ofertat dorëzoheshin në mënyrë të centralizuar, duke ngritur dyshime se ato përgatiteshin nga një burim i vetëm dhe paraqiteshin si konkurruese.

Ai shton se në shumë raste dokumentet vinin të mbyllura në zarfe me pseudonime, ndërsa grupet e punës thjesht firmosnin pa bërë ndryshime. “Asnjë projekt nuk ndryshohej nga ato që silleshin, por miratoheshin siç ishin”, thekson ai.

Një tjetër element shqetësues, sipas Sulit, ishte fakti që procedurat sekrete të prokurimit nuk publikoheshin, duke e bërë edhe më të lehtë manipulimin e tyre.

Ndërkohë, në një dëshmi të mëparshme, vetë Daniel Shima ka deklaruar se veprimet e tij janë kryer me dijeni dhe porosi nga drejtuesja e institucionit, e cila tashmë është nën hetim dhe ndodhet në arrest shtëpie.

Çështja ka ngritur pikëpyetje serioze mbi transparencën dhe integritetin e procedurave të prokurimit publik, ndërsa pritet që hetimet e SPAK të zbardhin plotësisht përgjegjësitë dhe mekanizmat e kësaj skeme të dyshuar.