Emrat/ Kuvendi zgjedh sot anëtarët dhe kryetarin e Këshillit Drejtues të RTSH

Kuvendi i Shqipërisë do të mblidhet sot në seancën e radhës ku në rend dite janë 25 pika për diskutim.

Seanca do  të zhvillohet në orën 10:00.

Ndër pikat që  bien në sy dhe kanë më shumë interes janë përzgjedhja dhe votimi i anëtarëve të Këshillit Drejtues së RTSH-së, me 10 kandidaturat që u kaluan javën e kaluar te Komisioni i mediave pas dëgjesës së mbajtur, si dhe i kryetarit të Këshillit.

Komisioni gjithashtu ka përzgjedhur më 11 mars, edhe 2 emrat kandidatë për kryetarë, teksa fituesi bëhet njëkohësisht edhe anëtari i 11 i Këshillit, përveçse drejtues. Zëvendësuesi i i ish-kryetarit Leka Bungo, do të jetë Helidon Haliti ose Fatjon Hoxhalli, të cilët janë 2 kandidatët përfundimtarë që garojnë për kryetar të Këshillit Drejtues të RTSH.

Kuvendi kishte shkarkuar Këshillin Drejtues të RTSH-së pas shkeljeve të shumta të gjetura në procedurat e garës për përzgjedhjen e drejtorit të përgjithshëm të RTSH-së.

Gjithashtu në rend dite është edhe votimi për anëtarët e Bordit të Institutit të Studimeve për Krimet dhe Pasojat e Komunizmit në Shqipëri.

Do të diskutohet dhe votohet për projektligjin për Bankën Shqiptare të Zhvillimit, nismë kjo e qeverisë shqiptare, për t’i ardhur në ndihmë bujqësisë dhe fermerëve.

Mes të tjerësh është edhe diskutimi për strukturën dhe organika e INSTAT-it.

Në listën me 10 kandidatë të Këshillit Drejtues të RTSH-së bie në sy emra si aktorët Bujar Kapexhiu, Rajmonda Bulku dhe Zamira Kita, regjisori Robert Budina, kompozitori Osman Mula, si dhe emrat e Pano Xhixho, Lorenc Vangjeli, Enio Civici, Alket Braho dhe Petrit Beci.

10 emrat e përzgjedhur për anëtarë:
Bujar Kapexhiu
Rajmonda Bulku
Zamira Kita
Robert Budina
Osman Mula
Pano Xhixho
Lorenc Vangjeli
Enio Civici
Alket Braho
Petrit Beci
2 emrat për kryetar Këshilli:
Fatjon Hoxhalli
Helidon Haliti