Endri Prifti dhe Ola Bruko konfirmojnë lidhjen e tyre në Instagram

Që këngëtari Endri Prifti dhe gazetarja e njohur Ola Bruko janë bashkë, është “vulosur”. Çifti po shijon një histori dashurie të bukur, dhe këtë e ka vendosur më në fund ta tregojë vetë Endri. Në llogarinë e tij në Instagram, korçari i serenatave ka postuar një foto romantike me partneren e tij, Olën.

“Nje jave te bukur, me shendet e shume dashuri ju urojme te gjitheve, e di qe eshte e marte,” ka shkruar ai, duke shtuar dhe disa emoji me zemër për të shoqëruar urimin për ndjekësit e tij.

Por, s’ka mbaruar me kaq! Në koment, Ola Bruko ia ka kthyer me po të njëjtin entuziazëm, duke konfirmuar kështu publikisht historinë e tyre të dashurisë. Kjo foto dhe ky shkëmbim fjalësh kanë tërhequr vëmendjen e ndjekësve të tyre, të cilët tashmë e dinë se ky çift është zyrtarizuar.