Epidemia e gripit mbërthen Shqipërinë, 21 mijë të prekur – rriten rastet me probleme kardiake

Tiranë, 29 Janar 2025 – Shqipëria po përballet me një epidemi të fuqishme gripi, e cila ka çuar në një rritje alarmante të infektimeve respiratore dhe komplikacioneve shëndetësore. Sipas të dhënave nga 14 qendrat shëndetësore në vend, numri i të prekurve ka arritur në afro 21 mijë persona.

Përveç komplikacioneve pulmonare, mjekët po raportojnë një rritje të ndjeshme të problemeve kardiake, sidomos miokarditit, si pasojë e bashkëqarkullimit të virozave dhe gripit.

Rritje e rasteve me komplikacione kardiake

Mjeku kardiolog Dr. Gishto thekson se situata është e rënduar jo vetëm nga ana pulmonare, por edhe nga ajo kardiake.

“Kemi pasur të sëmurë kardiakë të dekompensuar si rrjedhojë e infeksioneve virale. Shfaqen simptoma si mbajtje fryme, dobësi trupore dhe aritmi malinje. Në disa raste, virozat kanë çuar në fibracion arterial gjatë fazës së temperaturës,” shprehet mjeku.

Ai paralajmëron se përveç pacientëve me sëmundje kronike, edhe individë të shëndetshëm po shfaqin për herë të parë probleme kardiovaskulare të shkaktuara nga gripi.

Apel për vigjilencë: Kujdes me simptomat

Mjekët këshillojnë që të mos neglizhohen simptomat, veçanërisht:
• Temperatura e lartë që zgjat mbi tre ditë
• Vështirësi në frymëmarrje
• Dobësi trupore ekstreme
• Dhimbje kraharori apo çrregullime të ritmit të zemrës

Shkurti pritet të shënojë pikun e infeksioneve

Ekspertët e shëndetit publik paralajmërojnë se numri i të prekurve pritet të rritet edhe më shumë në fillim të muajit Shkurt, kur pritet piku i epidemisë. Ata u bëjnë thirrje qytetarëve të tregojnë kujdes të shtuar dhe të ndjekin masat mbrojtëse për të parandaluar përhapjen e mëtejshme të gripit.