Facebook deklaron fitime rekord

Skandalet e njëpasnjëshme, që nga ai i përdorimit të të dhënave të klientëve e deri te fshehja e raporteve mbi efektet te të rinjtë, siç duket kanë qenë shumë zhurmë për asgjë.

Facebook deklaroi 9 miliardë dollarë fitime në tremujorin e tretë, duke befasuar të gjithë skeptikët, që prisnin shifra shumë më modeste nisur nga skandalet që shpërthyen në gusht dhe shtator.

Shifrat madje janë edhe më pozitive se e njëjta periudhë e vitit të kaluar, kur deklaroi 7.8 miliardë dollarë.

Më shumë se skandalet, Facebook mund ta godasë përditësimi i fundit që Apple i bëri sistemin të vet iOS, ku Facebook dhe aplikacione të tjera do ta kenë më të vështirë të reklamojnë produkte të treta.

Ish-punonjësja e Facebook, Frances Haugen ka publikuar një sasi të dokumenteve të brendshme për publikun, duke pretenduar se Facebook e vendosi fitimin përpara sigurisë së përdoruesit.

Raporte të shumta mediatike thonë se dokumentet tregojnë se Facebook ka luftuar për të moderuar dhe jo për të ndaluar përmbajtjen që promovon gjuhën e urrejtjes dhe trafikimin seksual jashtë SHBA-së.

Të hënën, shefi ekzekutiv i Facebook, Mark Zuckerburg u tha investitorëve në një telekonferencë: “Ajo që po shohim është një përpjekje e koordinuar për të përdorur në mënyrë selektive dokumentet e rrjedhura për të paraqitur një pamje të rreme të kompanisë sonë”.