Fitore e dyshimtë e Interit, tërbohet Juventus: Ndeshje e manipuluar!

Një përballje elektrizuese dhe e mbushur me polemika shënoi javën e 25-të të Serie A, ku Inter triumfoi 3-2 ndaj Juventus falë një goli dramatik në minutën e 90-të nga Piotr Zielinski.

Zikaltrit e nisën më mirë sfidën dhe kaluan në avantazh që në minutën e 17-të, kur një krosim i Luis Henrique u devijua në mënyrë fatkeqe nga Andrea Cambiaso, duke përfunduar në rrjetë dhe duke befasuar portierin Michele Di Gregorio.

Reagimi i bardhezinjve ishte i menjëhershëm. Vetë Cambiaso shlyeu gabimin në minutën e 26-të, duke shënuar golin e barazimit pas një aksioni të ndërtuar mirë dhe asistit të Weston McKennie.

Pjesa e parë u karakterizua nga ritëm i lartë dhe tension maksimal. Interi goditi dy herë shtyllën, ndërsa në minutën e 42-të erdhi episodi që ndryshoi rrjedhën e ndeshjes. Pierre Kalulu, i ndëshkuar më herët me karton të verdhë, u përjashtua me të kuq për një ndërhyrje ndaj Alessandro Bastoni. Vendimi i gjyqtarit shkaktoi protesta të ashpra nga kampi bardhezi, pasi pamjet televizive lanë dyshime për intensitetin e kontaktit. VAR nuk ndërhyri dhe Juventusi mbeti me dhjetë lojtarë për gjithë pjesën e dytë.

Tensioni shpërtheu në fundin e pjesës së parë. Drejtuesit e Juventusit reaguan ashpër ndaj vendimit për kartonin e kuq të Kalulut, duke e konsideruar vendimin skandaloz. Në tunelin drejt dhomave të zhveshjes, nervat ishin në limit.

Në rresht të parë ishte trajneri Luciano Spalletti, i cili iu drejtua gjyqtarit me tone të ashpra duke akuzuar për deformim të lojës. Situata u tensionua më tej kur drejtuesit bardhezi ndërhynë për të qetësuar situatën.

Edhe legjenda e klubit, Giorgio Chiellini, ndërhyri duke kundërshtuar vendimin dhe duke kërkuar shpjegime nga gjyqtari, në një atmosferë të ndezur që pasqyroi gjithë dramatikën e “Derbit të Italisë”.

Epërsia numerike e Interit u konkretizua në minutën e 76-të, kur Sebastiano Esposito shënoi me kokë pas një asistimi të saktë nga Federico Dimarco.

Megjithatë, Juventusi nuk u dorëzua. Në minutën e 83-të, Manuel Locatelli realizoi një gol spektakolar me të djathtën nga distanca, duke barazuar në 2-2 dhe duke rikthyer emocionet në kulm në San Siro.

Kur gjithçka dukej se do të mbyllej në barazim, në minutën e 90-të Zielinski lëshoi një goditje të fortë nga jashtë zone që përfundoi në rrjetë, duke vulosur fitoren 3-2 për Interin dhe duke shpërthyer festën e tifozëve vendas.

Me këtë triumf, Interi shkëputet në +8 pikë nga ndjekësit në renditje, ndërsa Juventusi largohet nga fusha me krenari për rezistencën në inferioritet numerik, por me polemika të forta për arbitrimin që pritet të diskutohen gjatë.