FOTO/ E qëlluan me 4 plumba në kokë, ky është 35 vjeçari që u vra në atentat

Personi qe shihni ne foton me siper eshte Dorjan Shkoza, nje nga viktimat e atentatit te mbremshem ne Shkozet.

Shkoza, se bashku me Anxhelo Avdine u qëlluan me breshëri teksa qëndronin së bashku në trotuar duke konsumuar cigare.

Nga veprimet para hetimore dyshohet se është qëlluar nga një automjet tip “Mercedes”. 35-vjeçari Shkoza është qëlluar me më shumë se 4 plumba në pjesën e kokës, çka i kanë shkaktuar edhe vdekjen e menjëhershme në vendin e ngjarjes.

Sipas burimeve, hetimet për atentatin e dyfishtë janë fokusuar në trafikun e lëndëve narkotike dhe te biznesi privat që kishte 35-vjeçari Dorjan Shkoza. Ky i fundit mësohet se disa vite më parë ka qenë i dënuar me burg për trafik të lëndëve narkotike, çka dyshohet të jetë edhe shkak për ngjarjen.

Po ashtu, nuk është përjashtuar as ndonjë konflikt lidhur me biznesin e tij, një servis që shërben për lyerjen e makinave në Rrashbull të Shkozetit, shumë pranë vendit ku ndodhi ngjarja.

Policia dyshon se mund të ketë lindur ndonjë konflikt lidhur me shërbimet e bëra në këtë servis, gjithsesi hetimet e mëtejshme pritet të zbardhin ngjarjen e plotë. Ndërkohë, dëshmitarët janë shprehur se ngjarja ndodhi shumë shpejt dhe se automjeti nga ku u qëlluan dy të rinjtë nuk ka ndaluar në asnjë moment.

Personat që kanë qëlluar pritet të identifikohen nga kamerat e sigurisë, që ndodhen në bizneset e zonës ku ndodhi krimi.