Foto/Peshkaqeni 3.5 metra i gjatë del në bregdetin e Orikumit

Një peshkaqen me gjatësi prej 3.5 metrash është kapur sot në bregdetin e Orikumit, duke shkaktuar habi dhe shqetësim mes banorëve dhe peshkatarëve vendas.

Sipas peshkatarëve, ky lloj peshkaqeni njihet për përmasat e tij të mëdha dhe zakonisht qëndron në zona të thella të detit, duke lundruar deri në 70 metra thellësi. Kjo e bën shfaqjen e tij pranë bregut një ngjarje të rrallë dhe të pazakontë.

“Ky peshkaqen është i një lloji që nuk afrohet kurrë pranë bregut. Zakonisht e hasim në rrjetat tona vetëm në bregdetet jugore dhe në zona shumë më të thella,” thanë peshkatarët, të cilët treguan se peshkaqeni kishte rënë edhe më parë në rrjetat e tyre.

Ngjarja ka nxitur diskutime mes komunitetit të peshkatarëve mbi shkaqet që mund të kenë çuar peshkaqenin drejt bregut, duke përfshirë ndryshimet në temperaturën e ujit, lëvizjet e pazakonta të peshqve ose faktorë të tjerë mjedisorë.