Kryetari i Bashkisë së Tiranës, Erion Veliaj, aktualisht nën hetim nga SPAK për të paktën pesë akuza penale, është fotografuar në aeroport duke udhëtuar drejt Shteteve të Bashkuara të Amerikës. Burime pranë Veliajt konfirmojnë se ai ka mbërritur sot në Uashington për të marrë pjesë në ceremoninë e inaugurimit të presidentit Donald Trump.

Veliaj, i njohur për lidhjet e tij me rrjetin e George Soros, kundërshtarit të betuar të Trump, duket se po përpiqet të krijojë kontakte me administratën e re amerikane. Ai synon të përdorë këtë vizitë si një kartë politike, ndërsa përballet me akuza të rënda, përfshirë korrupsion, pastrim parash dhe mosdeklarim pasurie, të cilat janë objekt i hetimeve të thelluara nga SPAK.

Pjesëmarrja në eventet e Trump: Lobime dhe financime të dyshimta

Sipas burimeve, Veliaj ka siguruar biletat për eventet e inaugurimit përmes financimeve të dyshimta nga biznesmenë të lidhur me të dhe familjarët e tij, të cilët gjithashtu janë në hetim. Dyshohet se shuma të mëdha parash janë shpenzuar për këtë vizitë, përfshirë fluturimin, akomodimin dhe aksesin në aktivitete gjatë ceremonisë së Trump.

Këto të dhëna ngrejnë pikëpyetje të mëdha mbi burimin e financimeve dhe rolin e personave të lidhur me kryebashkiakun e Tiranës, të cilët mund të përdorin këtë moment për të ushtruar ndikim politik ose për të shmangur përgjegjësinë ligjore.

SPAK  kur do të veprojë?

Situata e krijuar ka nxjerrë edhe një herë në pah pasivitetin e SPAK ndaj zyrtarëve të lartë. Deri më tani, ndonëse akuzat ndaj Veliajt janë publike dhe të dokumentuara, asnjë masë konkrete nuk është marrë. Ndërkohë, burime pranë strukturave të drejtësisë sugjerojnë se hetimet mund të jenë të bllokuara për shkak të ndikimeve politike dhe mungesës së pavarësisë institucionale.

Lufta e ftohtë Rama-Veliaj

Kjo vizitë vjen në një kohë kur marrëdhëniet mes kryeministrit Edi Rama dhe kryebashkiakut Veliaj janë në tension të hapur. Burimet politike tregojnë për një përplasje mes tyre, ku Veliaj po tenton të shantazhojë Ramën me informacionet që zotëron, ndërsa kryeministri duket se ka de facto përjashtuar Veliajn nga rrethi i ngushtë i Partisë Socialiste.

Nëse SPAK vendos të veprojë mbi këto hetime dhe të zbulojë burimin e financimeve për udhëtimin e Veliajt, kjo mund të jetë një goditje e rëndë për kryebashkiakun dhe për rrjetin e tij politik. Në të kundërt, mosveprimi i SPAK do të forcojë perceptimin publik se drejtësia në Shqipëri mbetet e kapur nga politika.

Situata mbetet e tensionuar dhe pritet të ketë zhvillime të reja në ditët në vijim.