Gazment Bardhi: Në vend që të mashtrojë qytetarët, Etilda Gjonaj bën mirë të gjejë avokat

Sekretari i Përgjithshëm i PD-së, Gazment Bardhi ka reaguar pasi ministrja e Drejtësisë, Etilda Gjonaj iu përgjigj akuzave të Presidentit Meta në një konferencë për shtyp. Me një shënim në facebook, Bardhi shkruan se provat e paraqitura nga Presidenti, ku Gjonaj akuzohet si bashkëfajtore në atë që Meta e quan grushti i shtetit për kapjen e Kushtetutës, janë të pakundërshtueshme.

Sipas Bardhit, Gjonaj duhet të japë llogari para drejtësisë, ndërsa shton se ky është një test i rëndësishëm për SPAK-un.

Postimi i plotë:

Në vend që të mashtrojë qytetarët, Etilda Gjonaj bën mirë të gjejë një avokat. Sikur Edi Rama vetë të drejtojë personalisht mbledhjet e SPAK-ut, ajo është e pambrojtshme. Ministrja e Drejtësisë ka shkelur Kushtetutën, ka shpërdoruar detyrën dhe ka marrë pjesë në një akt mafioz për asgjesimin e Gjykatës Kushtetuese.

Provat e paraqitura nga Presidenti për grabitjen e një anëtari të Gjykatës Kushtetuese nga ana e qeverisë, edhe përmes veprimeve të paligjshme të Ministres së Drejtësisë, janë të qarta dhe të pakundërshtueshme. Etilda Gjonaj duhet të japë llogari para drejtësisë! Është një test i rëndësishëm për SPAK-un, i cili do të tregojë, nëse reforma në drejtësi ka dështuar me gjithçka apo jo.