Gjykata e Posaçme Kundër Korrupsionit dhe Krimit të Organizuar (GJKKO) ka komunikuar masën e sigurisë “arrest me burg” për Kreshnik Farrukun (Budlla), Julian Kollçakun dhe Maksim Ndocin. Të tre akuzohen si pjesë e një organizate kriminale që dyshohet se ka furnizuar Italinë me kokainë nga Ekuadori.

Sipas hetimeve, Farruku është identifikuar si përdorues i aplikacionit të koduar Sky ECC, përmes të cilit dyshohet se ka drejtuar operacionet për trafikun e drogës. Megjithatë, gjatë seancës gjyqësore, ai ka mohuar këto akuza, duke deklaruar: “Nuk jam unë ai që pretendoni.”

Kreshnik Farruku u arrestua të premten, teksa ndodhej në masën e sigurisë “arrest në shtëpi” për qëllime ekstradimi drejt Italisë. Dy të tjerët, Julian Kollçaku dhe Maksim Ndoci, janë arrestuar më herët, në nëntor 2024.

Të gjithë të akuzuarit përballen me akuzat për “trafik ndërkombëtar të narkotikëve” dhe “pjesëmarrje në grup të strukturuar kriminal.” Sipas burimeve, Farruku është subjekt i një urdhërarresti europian të lëshuar nga autoritetet italiane që prej vitit 2018.

Pasuri të konfiskuara dhe një histori kriminale e gjatë

Në dhjetor 2024, GJKKO konfiskoi 27 pasuri të dyshuara të vendosura përmes aktivitetit të paligjshëm të trafikut të drogës, në pronësi të Kreshnik Farrukut dhe Erneo Farrukut. Kreshnik Farruku, i njohur për përdorimin e 10 identiteteve të ndryshme, është një figurë kyçe në klanin kriminal Farruku, i akuzuar për grabitje banesash, trafik droge dhe aktivitete të tjera kriminale.

Hetimet ndërkombëtare ndaj Farrukut datojnë që nga viti 2007, ndërsa ai u arrestua në Spanjë në vitin 2019 së bashku me vëllain e tij dhe një të afërm. Farruku është dënuar nga Gjykata e Ancona-s në Itali me 6 vjet e 8 muaj burgim për trafik droge.

Ky rast është një tjetër shembull i ndërveprimit midis autoriteteve shqiptare dhe partnereve ndërkombëtarë për të goditur organizatat kriminale me rrënjë të thella në trafikun ndërkombëtar të narkotikëve.