GJKKO shtyn seancën për drejtorët e arrestuar të Veliajt

Teksa sot do të jepej masa në GJKKO për drejtorët e zyrtarët e Bashkisë së Tiranë të cilët akuzohen për korrupsion dhe shpërdorim detyre, seanca në Gjykatën e Posaçme është ndërprerë.

Mësohet se shkak është bërë kërkesa e avokatëve të personave të arrestuar, të cilët kërkuan më shumë kohë për t’u njohur me dosjen.

Mariglen Qato, Redi Molla dhe Taulant Tushe, drejtorët më të rëndësishëm në institucionin e bashkisë, do përballen me gjykatën me pranga në duar.

Të tjerët, do të njihen me masën Detyrim për paraqitje. Sipas SPAK, Qato dhe Molla janë pronarë de facto të kompanisë 5D, e cila ka rezultuar fituese në disa tendera pranë bashkisë. Hetimi nisi kryesisht nga SPAK, më pas ka qenë Belind Këlliçi ai që dërgoi një kallëzim të ri për dosjen 5D.