Gjykata lë në burg Esmerald Ballën dhe bashkëpunëtorin e tij

Ditën e sotme Gjykata e Durrësit ka vendosur që Esmerald Balla dhe shoku i tij, bashkëpunëtor në krim, të dënohen me burg.

Balla u paraqit i qetë në Gjykatë dhe me kokën ulur shprehu pendesë.

“Jam i penduar për atë që kam bërë”, tha ai. “E bëra për vetëmbrojtje, këtij versioni i qëndroj”, deklaroi në sallën e gjyqit lidhur me vrasjen e të atit.

Nga ana tjetër, avokatja e tij shtoi se 30-vjeçari ka qenë i tronditur, ndaj dhe ka ndërmarrë veprimin e rëndë.

Kurse avokati i Edison Brahjat, i cili akuzohet si bashkëpunëtor për të fshehur kufomën, u shpreh se arrestimi i Brahajt është i paligjshëm dhe se Prokuroria nuk ka pretendime të sakta.

“Policia për të përligjur arrestimin e tij e ka marrë në pyetje, i ka thënë thuaj të vërtetën dhe ik në shtëpi. Pasi ai thotë s’di gjë. Prokuroria nuk i ka pretendimet e sakta.”

Pavarësisht nga këto, Gjykata e Durrësit ka caktuar masën e arrestit me burg për dy të rinjtë.

Ka qenë kontradiktore dëshmia në gjyq e Edison Brahajt, 25-vjeçarit që punonte si çoban në fermën e Enver Ballës, i cili u vra nga djali i tij, Esmerald Balla.

Gjatë seancës së sotme në Gjykatën e Durrësit, avokati i 25-vjeçarit ka deklaruar se Edison Brahaj është dhunuar në polici që të pranonte bashkëpunimin në krim.

Megjithatë, i riu i pyetur nga togat e zeza ka hedhur poshtë versionin e dhunës dhe bashkëpunimin në vrasje.

Por, më pas ka deklaruar se punonte në fermën e lopëve të familjes Balla dhe ka ndihmuar Esmerald Ballën të fshihte kufomën e të atit duke e hedhur në një pus në fshatin Shënavlash, ku edhe banonin.

“Jam çoban tek ferma e lopëve dhe e ndihmova për të fshehur kufomën. Pasi më thërriti një ditë më pas Esmeraldi më dha 200 mijë Lekë”, u shpreh Edison Brahaj.