Akuzohet se vodhi 480 milionë lekë nga buxheti i shtetit

Më 11 janar, ish-sekretari i përgjithshëm i Ministrisë së Financave, Arlind Gjokutaj, së bashku me dy ish-drejtorët e këtij institucioni, Fatmir Hoxha e Alban Ruli, u arrestuan nga policia nën akuzën e korrupsionit në një çështje për kompensimin e përsëritur në mënyrë të paligjshme ndaj një shtetasi.

Vlera e vjedhur në buxhetin e shtetit raportohej të ishte plot 480 milionë lekë të rinj, por Gjokutaj ka arritur ta dalë pa u lagur, pasi vetëm së fundmi ka lënë qelinë dhe është dërguar në masën “Arrest shtëpie”, ku do ta bëjë gjumin i qetë dhe me xhepat plot.

Gjokutaj ishte një nga zyrtarët e paktë aktiv të arrestuar, por duket se edhe kjo çështje është zbehur shumë shpejt, duke treguar edhe një herë paprekshmërinë e individëve që drejtojnë qeverinë tonë dhe menaxhojnë paranë publike.

Arta Marku, prokurorja e çështjes në ngarkim të të pandehurve Arlind Gjokutaj, Fatmir Hoxha e Alban Ruli kërkoi në Gjykatën e Apelit të Juridiksionit të Përgjithshëm arrest shtëpie ndaj tyre, me gjykatën, që ia ka plotësuar dëshirën dhe ka dhënë këtë vendim për tre të pandehurit.