Policia italiane ka goditur një rast të trafikut të makinave të vjedhura nga Italia drejt Shqipërisë.
Kanë qenë efektivët e policisë rrugore në Itali që kanë hasur një transportues të ngarkuar me makina që rezultuan të ishin të gjitha të vjedhura.
Policisë i tërhoqi vëmendje në veçanti një makinë model Fiat 500, që ishte e ngjashme me një të denoncuar të vjedhur pak kohë më parë. Ata vendosën të kryejnë një hetim më të hollësishëm nga ku rezultoi se dokumentet që i paraqiti shoferi i transportuesit, një 38-vjeçar shqiptar, nuk përputheshin me të dhënat e makinës.
Shqiptari u arrestua në flagrancë ndërsa makinat u sekuestruan. Policia i ktheu Fiatin e vjedhur pronarit italian në provincën e Avellino-s, ndërsa po punon për identifikimin e origjinës së makinave të tjera.
