Grushtoi policin për një gjobë, shpallet në kërkim 28-vjeçari

Një incident i pashembullt ndodhi dje pasdite në Ksamil, ku një oficer policie dhe një qytetar u përfshinë në një përleshje fizike në rrugë pas një konflikti të papritur për një gjobë.

Policia e Sarandës ka shpallur në kërkim Lilo Mera, 28 vjeç, ndërsa vëllai i tij, i cili ishte i pranishëm dhe i përfshirë në ngjarje, është shoqëruar në komisariat.

Mera u konfliktua me një oficer të trafikut rrugor të Sarandës, pasi refuzoi të pranonin një gjobë për kundravajtje penale.

Debati filloi kur 28-vjeçari i mori nga dora pajisjen elektronike të gjobave oficerit dhe më pas e goditi me grusht.

Punonjësi i policisë, me inicialet A.K., 26 vjeç, reagoi, duke shkaktuar një përleshje fizike mes tyre, e cila zgjati deri në ndërhyrjen e oficerëve të tjerë që neutralizuan situatën e krijuar.

Menjëherë pas incidentit, vëllezërit Mera u larguan me automjet në një drejtim të panjohur.