Guvernatori i Linda Ramës, kritikon opozitën/ Me djegien e mandateve destabilizoni ekonominë

Duket se një nga strategjitë e Edi Ramës për të përpunuar opinion publik, pas hapit radikal të opozitës për të braktisur përfundimisht parlamentin është edhe ajo për të ngjallur frikën e një kolapsi të mundshëm ekonomik.

Flasin për trembje të investitorëve të huaj dhe investimet, ndërkohë që në këto 5 vite e gjysmë, pikërisht kjo qeveri i ka mbajtur ato larg në të gjitha mënyrat.

Në funksion të kësaj strategjie ka nisur në media një fushatë e paprecedentë, sipas së cilës lëvizja e fundit e opozitës pengoka reformat ekonomike.

Këtij korri i është bashkuar ditën e sotme, edhe guvernatori ‘I pavarur’ i Bankës së Shqipërisë, Gent Sejko, i cili ka deklaruar se situata aktuale politike, do të dëmtojë dhe ekonomikë shqiptare. Madje guvernatori shkon deri aty, sa që i bën thirrje opozitës që të krijojë stabilitet politik, në mënyrë që të vijojnë reformat dhe rritja ekonomike.

‘Çdo destabilizim politik sjell efekte në një ekonomi. Ne si Bankë e Shqipërisë kërkojmë stabilitet që rritja ekonomike dhe reformat të vijojnë’, thotë  Sejko.

Kjo deklaratë e tij duket fiks sikur ka dalë nga fjalimi i mbrëmshëm i kryeministrit Rama, i cili thoshte se protestat e dhunshme të ndërmarra nga opozita do të pakësojnë numrin e turistëve që vizitojnë vendin tonë dhe do stopojë investimet e huaja.

Ky guvernator që shpall opozitën si rrezik për ekonominë shqiptare e cila nuk ka pasur asgjë në dorë këto 5 vite e gjysmë dhe që nga dje ka vetëm ‘çelsat e kashtës’, është i njëjti që në kundërshtim me çdo ligj dhe Kushtetutën, ka licensuar një bankë me kapital të dyshimtë offshor (ABI Bank) prapa së cilës qëndron familja Rama, sipas akuzave të opozitës.