Haxhia: Astrit Kalaja, një baba i vrarë nga të gjithë ne

Pas ekzekutimit tronditës të gjyqtarit Astrit Kalaja, kreu i Dhomës së Avokatëve, Maks Haxhia, ka dhënë një deklaratë të fortë dhe të pazakontë, duke theksuar përgjegjësinë e të gjithë sistemit: drejtësinë, avokatët, shtetin dhe shoqërinë në tërësi.

Në një intervistë për “Top Story”, Haxhia theksoi rëndësinë e dëgjimit të zërit të njerëzve dhe kritikoi mungesën e reagimit institucional. Ai u shpreh se kjo ngjarje na kthen në një realitet të hidhur, të mohuar më parë: “Nuk dua të marr flamurin e atyre që kemi thënë më parë, por kjo ngjarje na kthen pas në një realitet që e kemi mohuar. Këtu nuk dëgjohen njerëzit.”

Kreu i Dhomës së Avokatëve përshkroi “terenin makabër” që sipas tij është krijuar nga pakujdesia institucionale, arroganca profesionale dhe mungesa e përgjegjshmërisë.

“Përballemi me një terren makabër që ushqehen nga pakujdesia. Siç kam qenë gjithmonë, hapur, unë jam avokat dhe këtë profesion e kam të shenjtë, këtu jemi fajtorë të gjithë.”

Duke reflektuar mbi tragjedinë personale të gjyqtarit Kalaja, Haxhia u shpreh me dhimbje për atë që humbi shoqëria dhe profesioni.

“Këtë baba, këtë qytetar e vramë të gjithë. Edhe ne avokatët kemi pjesën tonë, avokatët duhet të jenë njerëzorë dhe realë, t’i thonë klientit që nuk bëhet kjo gjë, nëse i thuhet që po bëhet, atij i krijohet një fyerje. Ai ishte njeri që kur shkonte në shpi shkonte që të ishte i qetë.”

Sipas Maks Haxhias, rruga përpara kërkon përgjegjësi dhe reflektim të thellë për të ndalur ngjarje të tilla tragjike që godasin jo vetëm individin, por gjithë sistemin e drejtësisë dhe shoqërinë.