Vrasja e gjyqtarit Kalaja, Apeli nxjerr nga qelia rojen e arrestuar

Gjykata e Apelit Tiranë ka vendosur të ndryshojë masën e sigurisë për Koxhaj nga “Arrest në burg” në “Arrest në shtëpi”. Banush Koxhaj, punonjës sigurie në Gjykatën e Apelit Tiranë, ndodhej në sallën e gjyqit ditën kur u ekzekutua gjyqtari Astrit Kalaja.

Gazetari Elton Qyno raporton se shkak i zbutjes së masës së sigurisë për Banush Koxhaj ka qenë gjendja e tij e rënduar shëndetësore, pasi ai vuan prej kohësh nga diabeti.

Sipas hetimeve, Koxhaj nuk ka ushtruar kontroll fizik ndaj Elvis dhe Gjon Shkambit, të cilët hynë të armatosur në sallën e gjyqit. Megjithëse detektori i skanerit të gjykatës sinjalizoi prezencën e sendeve metalike, punonjësi i sigurisë qëndroi i ulur dhe nuk ndërhyri, duke lejuar që Elvis Shkambi të kalonte perimetrin e sigurisë.

Në momentin që gjyqtari Kalaja dha vendimin, Shkambi qëlloi drejt tij me një pistoletë prodhim gjerman, “Welt Waffen Broëning”, duke e lënë të vdekur në vend. Me të njëjtën armë, Shkambi plagosi edhe babën dhe birin, Ragip dhe Elvis Kurtaj, të cilët ndodheshin në gjyq. Ekspertiza mjeko-ligjore konfirmoi se një plumb i vetëm kishte plagosur babë e bir.

Dy të dyshuarit, Elvis dhe Gjon Shkambi, vijojnë të mbahen në burg, nën akuzën për “Vrasje në rrethana cilësuese ndaj gjyqtarit” kryer në bashkëpunim dhe “Mbajtje pa leje të armëve dhe municioneve”.