I arrestuari i pestë për vrasjen e Behar Sofisë përlotet në gjyq, ja deklarata e tij

Gjykata e Posaçme vendosi dje masën e sigurisë “Arrest me burg” për Bujar Lezën, të dyshuarit si bashkëpunëtor të autorit të vrasjes së Behar Sofisë, ngjarje e ndodhur më 25 shkurt në Tiranë.

Leza gjatë seancës së masës u përlot dhe u shpreh se nuk kishte asnjë lidhje me krimin, por SPAK-u duket se ka prova të sigurta, që 45-vjeçari nga Larushka e Krujës, ka siguruar mjete për vrasjen e Sofisë. Prokuroria tha se Leza kishte vjedhur biçikletën dhe siguruar armën e vrasjes.

Mbi 45-vjeçarin rëndojnë veprat penale “Vrasja me paramendim” dhe “Mbajtja pa leje e armëve, armëve shpërthyese dhe municionit”, kryer në bashkëpunim të veçantë, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.

Për pak ditë ai do të fitonte lirinë, pasi i përfundonte dënimi për dhunë në familje që po e vuante në burgun e Fushë-Krujës, ku dhe iu komunikua akuza dy ditë më parë. Në muajin mars të këtij viti, Policia në bashkëpunim me SPAK-un arrestuan 4 persona, duke deklaruar se kishin zbardhur vrasjen e biznesmenit Behar Sofia.

Sipas dosjes hetimore, personi që dyshohet se ka qëlluar për vdekje Sofinë, 24-vjeçari Ernejt Shyti, rezulton se të paktën një muaj ka vëzhguar me detaje dhe të gjitha lëvizjet 66-vjeçarit. Ndërsa Skënder Vathi, i cili konsiderohet si organizator i këtij krimi të rëndë, e kishte shoqëruar disa herë Ernejt Shytin me qëllim që ta njihte nga afër viktimën.

Policia dhe Prokuroria thonë se logohen të gjithë telefonat që mbanin personat e dyshuar në të njëjtin vend. Ndërkohë që përveç faktit se Skënder Vathi dhe Leonar Xhixha e kishin shoqëruar me automjetin e tyre të dyshuarin Ernejt Shyti që ta njihte viktimën, edhe vetë ata kanë vëzhguar lëvizjet e Sofisë.

Një ditë përpara se Behar Sofia të ekzekutohej, në një kamera sigurie shfaqet organizatori Skënder Vathi, i cili qëndron në një tavolinë larg disa metra nga Behar Sofia, i cili sapo kishte kaluar COVID-19 dhe kishte filluar të lëvizte.

Në dëshminë e siguruar nga gazeta “Panorama”, Ernejt Shyti jep detaje para hetuesve për njerëzit që kishin organizuar krimin dhe e kishin rekrutuar për të kryer vrasjen, madje thekson se Skënder Vathi fillimisht ia kishte kërkuar që krimin ta kryente Xhuliano Visha, por ai nuk kishte pranuar sepse e kishte vëzhguar për një kohë të gjatë viktimën dhe kishte dyshime se 66- vjeçari Behar Sofia mund ta njihte dhe identifikonte atë dhe mund t’i shmangej e kështu të mos realizohej plani.