KPP me drejtues të rinj, emërimet ngrenë pikëpyetje për pavarësinë e institucionit

Komisioni i Prokurimit Publik (KPP), institucioni që shqyrton ankimimet për tenderët publikë dhe konsiderohet si “gjykata e tenderimeve” në Shqipëri, ka zgjedhur drejtuesit e rinj të tij.

Sipas informacionit të siguruar, Ismail Shehu është zgjedhur kryetar i KPP-së, ndërsa Donika Daci është zgjedhur nënkryetare e institucionit.

Burime bëjnë me dije se Ismail Shehu konsiderohet si një emër i afërt me ministrin e Drejtësisë, Ulsi Manja, ndërsa Donika Daci lidhet me ministrin e Ekonomisë, Kulturës dhe Inovacionit, Blendi Gonxhja.

Në përbërjen e Komisionit bën pjesë edhe Nertil Kanina, i cili raportohet si një emër i afërt me Inspektorin e Lartë të Drejtësisë, Artur Metani, si dhe Edvin Simo, i konsideruar si i afërt me  Niko Peleshin.

Këto zhvillime kanë rikthyer në vëmendje debatin mbi pavarësinë e Komisionit të Prokurimit Publik, një institucion kyç që vendos për fatin e qindra milionë eurove tendera publikë dhe që ka rol vendimtar në shqyrtimin e ankesave të operatorëve ekonomikë.