I dënuar me 35 vjet, kapet i shumëkërkuari në Vlorë

Pas pesë orësh kërkimesh intensive dhe përdorimit të dronëve, Policia e Vlorës ka vënë në pranga autorin e dyshuar të vrasjes që tronditi mbrëmjen e djeshme fshatin Gjorm.

Në pranga ka rënë Bertil Alliaj, 32 vjeç, banues në Gjorm të Selenicës, i cili dyshohet se vrau me armë zjarri kushëririn e tij, D. A., 36 vjeç, pas një konflikti për motive të dobëta.

Ngjarja ndodhi mbrëmjen e djeshme, rreth orës 20:00, përpara banesës së autorit të dyshuar. Pas krimit, Alliaj është larguar me shpejtësi duke u fshehur në zonat malore përreth.

Forcat e policisë organizuan një operacion të gjerë kërkimi që zgjati për orë të tëra dhe, rreth orës 01:05 të mëngjesit, 32-vjeçari u arrestua.

Gjatë kontrollit fizik, policia i gjeti dhe sekuestroi një armë zjarri pistoletë tip “Beretta FS92”, së bashku me një krehër dhe 10 fishekë, e dyshuar si arma e përdorur në krim.

Në vendin e ngjarjes u gjetën edhe 6 gëzhoja dhe një predhë arme zjarri, që u morën si prova materiale.

Hetimet zbuluan se Alliaj ishte person në kërkim kombëtar dhe ndaj tij ishte ekzekutuar një vendim i Gjykatës së Vlorës i vitit 2016, që e dënonte me 35 vite burg për “Vrasje në rrethana cilësuese, kryer në bashkëpunim” dhe “Armëmbajtje pa leje”.

Materialet hetimore i janë referuar Prokurorisë së Vlorës për veprime të mëtejshme.