Identifikohet autori i plagosjes në Shkodër, ngjarja e 6 viteve më parë që ngre dyshime

Policia ka identifikuar autorin e plagosjes së 28-vjeçarit Edis Reçaj dy ditë më parë në qytetin e Shkodrës.

Blutë e Shkodrës kanë njoftuar se dyshohet që  autor i plagosjes është shtetasi Elfat Salihi, 31 vjeç. Policia ka dyshime se i plagosuri dhe autori njiheshin me njeri-tjetrin dhe kanë qenë duke qëndruar bashkë mbrëmjen e 19 prillit kur ndodhi plagosja,  edhe pse i plagosuri ka deklaruar se nuk e ka idenë se kush e ka plagosur.

Elfat Salihi është shpallur në kërkim, ndërsa mësohet se një ngjarje e ngjashme i ka ndodhur dhe vetë të dyshuarit. 6 vite më parë, në 2016-ën Elfat Salihi mbeti i plagosur në afërsi të banesës së tij teksa u qëllua me 4 plumba, por arriti që të shpëtonte. Autori dhe i plagosuri kanë debatuar dhe në atë konflikt të çastit ka ndodhur edhe plagosja. Policia po punon për gjetjen dhe kapjen e autorit të dyshuar.